全民造星4丨梁祖堯被指導師做得差 發千字文列7點反駁網民:女團只能唱歌跳舞?

·3 分鐘文章
梁祖堯
梁祖堯

ViuTV《全民造星IV》噚晚(6日)已播出第三回合淘汰賽最後一組比賽,比賽至今,阿妹(黃敏蕎)、Yanis(吳欣諺)等唔少高人氣參加者都被淘汰,早前咖喱(黃雅慧)淘汰後,好多網民仲將怒火指向B組導師梁祖堯,並指佢一直以嚟做導師做得好差,仲有偏幫之嫌;梁祖堯就喺社交平台發千字長文反駁網民對其批評。

梁祖堯總括網民斥責嘅七點作出反駁:「做乜唔搵人幫手!你自己唱歌都唔掂!」、「點解應該留低嗰啲你就foul晒?」、「做乜鬼成日做戲呀?選女團定係選劇團?」、「你根本唔識做導師!」、「你知唔知咩叫觀眾緣呀仆街!」、「靚就係觀眾緣啦你識唔識架?」、「你唔使解釋啦,我見到嘅唔係咁囉!」,梁祖堯就話到自己真係唔識做人導師,所以而家學緊,成世流流長每一日都係學習。

對於網民指佢似選女劇團多過女團,梁祖堯表示今季《全民造星》方針係要加強戲劇訓練,相信呢個都係製作組搵佢嘅原因,又指每次比賽得兩星期或更短時間準備,喺某啲組別加入戲劇元素只係希望作品可以豐富啲,仲話戲劇容易呈現到參賽者性格唔同面向,令觀眾加深記憶:「次次都淨係排一啲勁歌熱舞,又點見到佢哋呢一面呢?呢啲面向會為佢哋帶嚟另外一啲機會,而呢個就係我嘅責任。香港嘅女團只能唱歌跳舞?不如換個角度諗,如果透過呢個比賽能夠發掘佢哋更加多嘅可能性唔係更有趣咩?」

至於決定淘汰人選,梁祖堯表示每集時間有限,無可能剪晒淘汰嗰個人嘅全部原因,製作組只會剪想你睇到嘅嘢出嚟:「我只可以講,傾邊一個出局都係我哋兩位導師+花姐同呀wing四個人一齊嘅決定。」,梁祖堯又指,造星除咗係一個選秀比賽,仲係一個綜藝節目,就係要有呢啲戲劇嘅效果,節目先好睇,佢感謝大家睇到呢篇文最尾,亦自嘲:「冇咩事我返出去繼續俾人鬧啦。」

梁祖堯Facebook
梁祖堯Facebook
梁祖堯
梁祖堯
梁祖堯任《全民造星IV》B組導師
梁祖堯任《全民造星IV》B組導師
梁祖堯任《全民造星IV》B組導師
梁祖堯任《全民造星IV》B組導師
《全民造星IV》截圖
《全民造星IV》截圖
梁祖堯
梁祖堯

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能