全民造星4｜24歲安希婷曾嫁台灣老公被家暴 離婚後自強母兼父職

ViuTV選秀節目《全民造星IV》18日播出嘅一集，其中一組對戰隊伍係89號安希婷與8號陳玥伶（小砂），最後由24歲安希婷晉級60強，但原來年紀小小嘅佢已經做咗人母，仲經歷過家暴失婚？

安希婷13歲開始紋身，2018年奪得第一屆香港紋身小姐選舉冠軍，而家係一位紋身師，仲係歌手同演員。安希婷早年去台灣發展期間認識到街頭藝人練懿樂，仲結埋婚生埋仔，不過喺2021年2月離婚，安希婷就帶同囝囝回港，離婚原因卻同家暴有關。

有網民就將當時安希婷講述被家暴嘅IG限時動態截圖，例如安希婷懷孕七至八個月期間，練懿樂飲酒後吵架，勒住安希婷條頸喺地上拖行，並用門夾佢手指，最後要報警同埋去醫院驗傷；練懿樂又試過拿物件丢安希婷，仲去廚房拎剪刀，安希婷當時嚇得衝落樓搵保安求助。事件當時被網民討論並大鬧練懿樂，練懿樂否認一切，但事件最終鬧上當地法庭，及後法庭向安希婷批出保護令，而安希婷亦喺IG指：「法律証明了我沒有抹黑，所講的都是事實，還了我一個公道。」

安希婷今年4月時再次喺香港開紋身店，仲不時唱Cover同埋街頭表演，工作時候都揹住囝囝，而安希婷就曾表示自己每日都好攰，但好彩仲有囝囝：「不知道還要多久時間才能走出創傷，每天都很累…但是很開心梓軒跟在我身邊，讓我不太願意想起的台灣…帶著眼淚睡了，明天還要工作賺錢顧小孩，當媽也當爸，不過我樂意，自問不是個完美的人，但絕對是個負責任的人。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！