《全民造星III》將於11月播出 呢班藝人參賽爭取再出道

ViuTV選秀節目《全民造星》喺過往兩輯話題度十足，成功捧紅組合MIRROR及ERROR。新一輯《全民造星III》將於11月播出，今次節目採用全新賽制，只針對已經出道嘅男女藝人，給予一個二次發力嘅機會，而家就同大家睇下暫時有邊幾位已知嘅熟識面孔參加啦！

顧定軒
現年26歲嘅顧定軒（Zeno）喺中學開始接觸模特兒工作，2014年偶然下獲得電影《愛·尋·迷》嘅視鏡機會，入行後陸續獲得唔少演出機會，例如電影《明月幾時有》、《翠絲》及《麥路人》等等，每一個電影角色都令人眼前一亮。至於電視劇方面，顧定軒喺今年憑《那些我愛過的人》中飾演黃翠如嘅繼仔朱嘉炳成功入屋，除此之外佢都拍過唔少電視台嘅劇集，例如香港電視《大眾情性》、RTHK《手語隨想曲6》、《火速救兵IV》、邵氏《飛虎之雷霆極戰》、ViuTV《身後事務所》及待播劇《男排女將》等等。

葉巧琳
喺演藝學院主修古典聲樂嘅葉巧琳（Mischa），2012年與同學袁偉峰及羅健邦組成樂團Trekkerz，2013年參加歌唱比賽獲得冠軍後入行。喺2015年，葉巧琳獲公司安排單飛發展，並推出第一首歌曲《孤單的貝多芬》，當時頗受樂迷喜愛，不過可惜後勁不繼。直至2018年，葉巧琳推出個人專輯《The Makings Of》。

羅凱鈴（Judas Law）
現年26歲嘅羅凱鈴（Judas Law）被網民譽為「Busking王」，原本係一名街頭歌手，2018年有網友上載咗佢喺大埔墟站自彈自唱梁詠琪歌曲《一天一天》嘅短片到社交網站，短片喺網絡瘋傳令Judas瞬間人氣急升。其後Judas推出首張個人大碟，並於2019年正式出道成為樂壇新人。

李浩軒
24歲嘅李浩軒（Will）原本係一名街頭歌手，因一次公開演出被娛樂公司賞識。為咗完音樂夢，佢選擇放棄高人工嘅工作轉行做歌手，並於2018年正式出道及推出首支派台歌《窮我一生》。

E-kids成員林詠倫（Alan）
現年40歲嘅林詠倫（Alan）好大機會係今輯最年長嘅參賽者，出道年資長達18年。Alan喺2002年以MK-Pop始祖E-kids成員身份出道，佢哋喺2006年解散，2016年宣佈重組，不過佢哋都有唔少經典歌曲，例如《初哥》、《開始戀愛》、《下學期》及《青春火花》等等。E-kids分別喺2017及2018年舉行演唱會都大收旺場，得到唔少樂迷支持。不過其後佢哋又再沉寂，Alan更被迫轉行，除咗開設媒體公司工作室之外，佢仲投資外賣老火湯店，有時仲要親自送外賣。

李昭南（Mishy）
歌手吳浩康（Deep）前度李昭南（Mishy），自細跟隨家人移民美國，喺美國加州大學戴維斯分校高級榮譽文學士畢業，之後喺當地電視台做主播，後來回流香港發展演藝事業。加入ViuTV後，Mishy做過唔少節目主持之外，佢仲有幫ViuTV拍劇，例如《詭探前傳》 、《假設性無罪》及《黑市》等等。另外，現年31歲嘅Mishy有強勁嘅音樂子，鋼琴、 鼓、手風琴、竪琴及結他全部都識，上年更成為女子樂隊Luna嘅隊長。

蔡寶欣（Pony）
現年25歲嘅蔡寶欣（Pony），係ViuTV選秀節目《Good Night Show廣告女皇》季軍得主，加入ViuTV短短兩年已經有唔少演出機會，例如《我食飯你埋單》、《十五分鐘熱度》、《C9旅行團》、《啪啪Partner》、《Show肌》及《今晚趁熱食》等等。

Bingo成員陳康琪（Odilia）
入行前做過舞蹈員嘅陳康琪（Odilia），2016年以女子組合Bingo成員身份出道，不過可惜星途麻麻，只係出過幾首單曲。不過佢都有其他幕前工作，例如ViuTV節目《鬼同妳上位》、《啪啪Partner》客席主持、《對不起標籤你II》、客串無綫劇集《 法證先鋒IV》及電影《家有囍事2020》等等，當中佢憑《啪啪Partner》中爽朗性格，大講性愛話題而獲得網民關注。

Bingo成員關嘉敏（Carman）
有「翻版周秀娜」之稱嘅關嘉敏（Carman），以Bingo隊長嘅身份出道4年，不過星途認真麻麻，最為人熟悉嘅只係2016年參加ViuTV真人騷《脫獨工程》及曾與林作拍攝微電影《敗家仔》。除此之外，佢亦有參演劇集《黑市》嘅「碟仙」和「過夜」單元、客串無綫劇集《 法證先鋒IV》及為探靈節目《又要睇又要驚》同名MV擔任女主角等等。另外，一直希望拍動作片做打女嘅Carman，喺今年就拜冼灝英門下學大聖劈掛。

除咗以上咁多位之外，將會亮相《全民造星III》嘅已出道藝人仲有黃劍文、前As One成員陳葦璇（原名陳嘉茵）、《造星II》參加者劉瑞祈、姜嘉欣、蘇家欣、丁悅、劉若寶、王嘉莉及陳毅燊等等。