【全民造星3】粉紅頭Candy離婚後追尋音樂夢 街頭賣唱養自己

《全民造星III》今年搵一班已出道藝人參賽，比起往年嘅後生仔自然有更多經歷。喺30強對決，俾B組導師彭秀慧放入淘汰名單第一位嘅Candy（吳筱茵），隨住B組第一場演出落敗，《造星》之路正式完結。彭秀慧認為Candy有一定才華但冇做到要求，未能夠認真對待演出嘅細節，所以第一個就將佢放入「死亡名單」。而喺之前回合嘅片段都有提到，Candy因為要工作搵食未能參與排練，影響咗小組進度。

節目入面睇落唔多討好嘅Candy，早前接受訪問講出背後另一段故事。

喺單親家庭長大，Candy自覺做咩都唔出色，除咗音樂之外。細細個Candy就參加唔少音樂比賽，包括TVB《殘酷一叮》，後來佢北上成都讀音樂，因為學費平，而且內地酒吧演出發展蓬勃。不過畢業後屋企人就叫Candy「回流」，佢想教結他同演唱，如果返正常朝9晚6工作好難配合，於是Candy去咗做啤酒promoter、酒吧拳手，留返日頭時間教班，但係成日要同醉漢打交道。

後來Candy結識任職水警嘅前夫，結婚而且誕下今年2歲嘅囝囝，可惜兩個人由音樂到政見都南轅北轍，最終前夫喺舊年10月提出離婚。Candy強調前夫係一個好人，只係大家太多睇法上嘅唔同，對方分開前仲叮囑「唔好玩咁多啦」。回後單身之後，Candy租套房住，全心全意做音樂工作，演出、教結他、作曲，收入可以養活自己，直至疫情爆發影響餐廳演出，於是佢就走到街頭賣唱或者網上直播，難怪參與唔到《造星》排練。

街頭賣唱睇天做人之餘，又要同行家鬥快霸位，而且收入唔穩定，唱一日可能只有100蚊。Candy話疫情對賣唱收入影響大約少咗三分一，但更在意係少咗觀眾企定定聽歌。至於日後發展，Candy希望有個人單曲出唱片同埋開演唱會，希望《造星》帶來嘅知名度可以幫佢一把啦！