兩個女兒都是心肝寶貝 鍾麗淇(下):最好的教育就是身教!

蘋果動新聞

15年11月,鍾麗淇的小女兒Michela出世,身體健康性格活潑,像爸爸一樣古靈精怪,又像媽媽一樣樂觀愛笑。鍾麗淇說兩次為人母的經歷完全不一樣,不過幸福和牽掛還有為人母的責任感又其實同出一轍:「生多一個都係想大女可以有個伴,又可以感受到兄弟姊妹之間嘅親情,最開心係Michela只得三歲已經識得照顧家姐、知道要對家姐加倍溫柔,見到佢去到邊度玩,都唔會唔記得家姐,見到佢總係喺家姐軟弱無力嘅時候,幫手撐住托住家姐身體,呢啲時候就覺得最感動最安慰。」

盡量避免厚此薄彼
經歷過第一次,第二次生育女兒對鍾麗淇來說,顯得特別輕鬆又容易:「細女真係好易湊又鍾意笑,頭兩年餵人奶輕鬆順利,話咁易就過咗。不過始終有兩個女,年紀唔同需要都唔同,我更加要小心嘅係照顧佢哋兩個感受同心理。開頭坐月餵細女,冇得送家姐返學陪家姐瞓,我都覺得好內疚唔好受,其實要適應要協調嘅唔止個女,仲有我自己。Michela好細個我就當佢大人咁教,教佢家姐個病叫咩名、病名點讀,教佢家姐需要我哋點樣關注點樣照顧,我抱家姐Michela會扁嘴呷醋,我就教佢,不如你同媽咪一樣抱吓家姐照顧家姐啦。除咗自己屋企人,仲有出面好多異樣眼光要面對呢!個女始終會大,朋友始終會問佢,點解你家姐唔同我哋玩?點解你家姐唔識講嘢?行路慢啲嘅?對外應該用咩態度應該講啲咩,從來就冇一個絕對正確標準嘅答案,我最安慰嘅係,Michela細細個已經好細心、見到家姐需要啲乜,幫家姐搽藥幫家姐按摩,玩到幾開心都好,總會記得返轉頭撩吓家姐陪吓家姐,咁就夠喇!」

image1
image1
image2
image2
image3
image3

嘮叨不如以身作則
八年為人母,問鍾麗淇最大的感受是甚麼?她說幸福和快樂沒有人們想像的那麼難追求:「為人父母,我哋總想俾小朋友最好嘅,總想再賺多啲錢,再買大間啲嘅屋。不過每個人都明,錢永遠唔會搵得晒,間屋再大唔代表人就變得快樂,一個屋企有愛有笑聲,其實已經好足夠。身邊朋友細細個就帶仔女報名校做各種評估,我就覺得童年唔應該經歷呢啲,幼兒時期最好嘅教育一定係來自父母嘅陪伴同教導。你日哦日哦講幾多道理、俾佢睇幾多書都好,實際效果唔會好得過父母親身做俾佢睇,正如一個飛機師讀幾多書都好,你唔俾佢親自操作架真飛機,讀咁多書有用咩?所以我叫佢唔好發脾氣,我自己就唔會隨便鬧人;我性格樂觀鍾意笑,佢自然學到我一樣容易氹自己開心;我哋對屋企人對朋友好,對長輩有禮貌,佢會學識尊重同規矩,學識愛錫照顧身邊人;仲有爸爸,總係用好多時間陪家姐陪佢玩,兩父女成日玩啲只得佢哋兩個明嘅遊戲同玩笑,呢啲相處時光同從小建立家嘅概念,對小朋友嘅影響就真正係一世!」

image4
image4
image5
image5

 

想知更多育兒資訊 請留意Easy Pama

你可能還想看