八十年代樂隊熱潮 Beyond散band最可惜 達明一派前衛35年 Raidas快紅快散

太極樂隊鍵琴手唐奕聰(Gary Tong)疑因心臟病離世,唔少樂迷都感到可惜。太極喺1980年代香港樂隊熱潮之下冒起,同期仲有好多唔同風格嘅樂隊組合一齊人氣爆發,令到一向被巨星偶像壟斷嘅香港樂壇,出現過一番新氣象。

達明一派

八十年代樂隊熱潮 Beyond散band最可惜 達明一派前衛35年
八十年代樂隊熱潮 Beyond散band最可惜 達明一派前衛35年

本身夾開band嘅劉以達,1984年喺音樂雜誌登廣告搵人合作,結果同應徵嘅商台DJ黃耀明一拍即合,組成達明一派。1986年達明首張同名EP面世,展開35年音樂旅程。多年來推出過8張專輯,經典歌有《迷惘夜車》、《石頭記》、《天花亂墜》等。1990年《神經》專輯後各自發展,劉以達曾經組成「劉以達與夢」,又推出過個人音樂專輯,以及從事電影配樂。當然最多人記得係達叔拍過嘅喜劇!而明哥就以歌手身份發表歌曲。達明喺1996年及2005年再次推出專輯,去年舉行音樂會,將頭2張專輯嘅歌現場演繹一次,並會以同一概念舉行演唱會,演唱其餘6張專輯。

Beyond

八十年代樂隊熱潮 Beyond散band最可惜 達明一派前衛35年
八十年代樂隊熱潮 Beyond散band最可惜 達明一派前衛35年

可以話係香港最有地位嘅殿堂樂隊,1983年成立,以獨立樂隊身份出過唱片搞過音樂會。後來簽約經理人並加入大型唱片公司,曲風貼近流行音樂,更因《真的愛你》大紅而大受歡迎。由地下走向流行之後,Beyond尋求更大創作空間,並且開拓日本、台灣市場,可惜主音黃家駒1993年6月參與電視台遊戲節目時,不慎由高處墮下昏迷,6日後逝世。自此Beyond進入黃貫中、黃家強同葉世榮主導嘅3人時代,直至1999年推出Good Time專輯後宣布分開發展。2003年Beyond再次重組,舉行20周年演唱會,但翌年樂隊再次宣布解散,2005年的Beyond The Story Live成為最後一個Beyond演唱會。之後三子分別以唔同身份及組合開show,但總未能夠齊集3人令Beyond再現。

太極

80年代同Beyond並駕齊驅嘅樂隊,成員共有7個人亦係當年罕有。成員包括主音雷有輝(Patrick)、雷有曜(Albert),主音及吉他手鄧建明(Joey)、劉賢德(Ernest),低音吉他手盛旦華(蛇仔),鼓手朱翰博(Ricky)及鍵琴手唐奕聰(Gary)。太極嘅歌曲極具流行元素,《留住我吧》同《每一句說話》根本係主流情歌格局,而《紅色跑車》同《全人類高歌》又能夠挑動聽眾情緒。1993年亦係太極嘅重要年份,因為主音之一Albert移民,樂隊變成6人團隊。到1995年Utopia專輯後分開發展,主要都係做音樂工作,間中六子亦會因為開演唱會短暫重組。

夢劇院

八十年代樂隊熱潮 Beyond散band最可惜 達明一派前衛35年
八十年代樂隊熱潮 Beyond散band最可惜 達明一派前衛35年

以而家嘅字眼嚟形用夢劇院,可以話係「小清新文青女團」。成員李敏同劉文娟都係中文大學學生,因為參加大專歌唱比賽獲賞識而入行,之後嘅作品曲風都保持住知性味道,難得2位外形都標緻,劉文娟甚至某啲角度超似酒井法子。夢劇院出過3張唱片之後宣布解散,劉文娟以個人歌手發展,又做過TVB《城市追擊》主持;李敏就退居幕後做文字創作,而家係電影編劇,近作有《拆彈專家2》。

Raidas

八十年代樂隊熱潮 Beyond散band最可惜 達明一派前衛35年
八十年代樂隊熱潮 Beyond散band最可惜 達明一派前衛35年

同達明同期嘅二人男子組合,成員有主力創作音樂嘅黃耀光,以及主音陳德彰。本來仲有一位成員,就係蔣志光,但係蔣當時已經簽約俾唱片公司,所以只能以「小光」名義幕後參與。另外Raidas嘅歌詞絕大部份由初出茅蘆嘅林夕包辦。

Raidas歌曲風格多元化,有英倫電音亦有大路作品,最為人認識嘅應該係《傳說》、《吸煙的女人》同《別人的歌》,《傾心》更加成為港台十大中文金曲之一。作品流行程度頗高,但因為唱片公司打算捧陳德彰個人發展,黃耀光決定離隊,Raidas只係出咗2張唱片1張EP就解散。後來單飛嘅陳德彰發展平平,轉做幕後配音;黃耀光就主力推廣正念及靈性音樂。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!