八歲仔睇波抽中獎 禮物竟然係大麻

19+

 

有冇人記得《買兇拍人》入面,張達明飾演嘅副導演,

開完工冇糧出搵監製追數,對方冇錢俾,竟然拎包大麻俾佢,

賣晒咪有錢收囉!

 

聽落好荒謬,但係當大麻係錢、甚至係禮物嘅玩法,

原來唔係得電影先有。

 

加拿大人BC省一個為小朋友而設嘅冰上曲棍球地方賽事,

同場仲有大抽獎。

獎品就係每隊參與球隊提供,價值至少50蚊加幣(約港幣$290)。

玩法係喺每份禮物前面放個抽獎袋,

買咗抽獎券又對某份禮物架有興趣的話,就放張抽獎券入去。

歷來啲禮物都係戲飛、桌上遊戲、糖果之類合家歡之選。

 

有位爸爸帶個8歲仔仔去玩,小朋友睇中一份貌似朱古力嘅禮物,

就放張抽獎券入去。

場波打完,大會通知呢位爸爸中獎,

但係獎品竟然唔係朱古力,而係價值200蚊加幣嘅大麻產品(約港幣$1160),

包括含有大麻成份嘅朱古力,連火機同吸食工具都有。

雖則大麻喺加拿大係合法,而且獎品包入面嘅都係經註冊嘅產品,

但係對於一個8歲人仔……又未免太刺激嘞。

小朋友聽到中獎,但係獎品唔啱佢食,當然好嬲。

 

大會解釋,呢份「大禮」標明只係俾成年人,

而且通知得獎嗰陣已經講明係大麻,得獎者(即係細路個爸爸)願意領獎,

安排亦無違反當地法例。

 

到底邊個咁有創意拎大麻當獎品?

原文傳送門

你可能還想看