再懷孕胎兒有愛德華氏症或成畸胎 符曉薇忍痛人工流產「這次是最後一次懷孕」

陳柏宇(Jason）同太太符曉薇(Leanne)2017年結婚之後，翌年Leanne就誕下女兒Abigail，一家三口生活愉快，Jason夫婦一向都想追多個，去年Leanne亦成功懷孕，但醫生發現係宮外孕，而且情況嚴重要切除輸卵管。兩夫婦仍未放棄，但係再次傳來壞消息。

今日Leanne喺社交平台發文，沉重道出再次懷孕但希望落空的經歷。Leanne話上次失敗之後仍然繼續嘗試，早前終於驗出懷孕。到第10週左右進行產檢時，醫生告知胎兒頸皮厚，代表可能有唐氏綜合症或心臟問題。Leanne同老公商量後，認為即使有唐氏綜合症，佢地仍然會生BB出嚟。

後來檢驗報告證實胎兒冇唐氏綜合症，但係有另一種名為「愛德華氏症」嘅病，好大機會胎死腹中，或者出世後只有短短壽命。Leanne上網搵資料，見到有其他媽媽個案推翻診斷，原來同類情況並唔罕見，檢查當日醫生都話有可能抽錯，令Leanne心存希望。

可惜，醫生好快就同Leanne講「唔好意思」，亦證實胎兒有「愛德華氏症」，會有腸外露、嚴重心臟問題及腳彎曲等問題，Leanne只好人工流產。雖然醫生建議盡快做，但Leanne抽時間一家四口去影孕照，以彌補陀Abigail嗰陣冇影嘅缺憾。Leanne亦寫下令唔少女性都感到心痛嘅一句「因為我相信這一次會是我最後一次懷孕。我已經沒有勇氣去承受再一次的打擊」。

Leanna曾經自責冇勇氣俾BB誕生，但係「每次想到要看你出世幾分鐘？幾個鐘？幾天？幾個月？我承受不了。從來我也是一個沒有運氣的人，我沒有這個運氣擁有你，我一生的運氣已經用了在和你爸爸結婚，和生了姐姐abi」。而老公Jason同樣難受，兩夫妻講到同BB嘅緣份，Jason都忍唔住想喊。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！