冷戰再冷戰……更傷感情;不如學下鬧交?

好集慣
·3 分鐘文章

這陣子《好集慣》跟你 Stay with me,即係一個人都可以好精彩!不過,如果你宜家一個人,係因為同情人處於「冷戰」當中,我勸你回頭是岸。皆因冷戰再冷戰只會更傷感情,無論情侶定屋企人有咩不滿最好都係鬧出口過癮啲。之但係,你識唔識鬧交先!

冷戰的你,是咪自以為是?
冷戰有咩問題?喂,呢個課題真係可以寫一本書⋯⋯但其實有啲最簡單嘅道理,你都知嘅,不過係扮唔知啫。

自以為是:呢啲人通常自以為是,冷戰就係一副覺得自己「永遠是對的」嘅態度。個勢死不屈服,要等人氹番仲一副高高在上的冷傲態度,更加自以為是。試問咁自我的人,怎能維繫關係?

不寛容:就算你真係啱咗咁又點?試問誰人沒有過錯?因為對方錯而不瞅不睬;呢種唔出聲,唔講嘢,視對方無到,根本係對錯誤零寛容。愛,係要忍耐,接受。

不尊重:無論邊個錯都好,冷戰,唔俾對方解釋,自己又唔出聲講點解嬲成咁,唔產生一次溝通機會,就會越令大家對彼此唔尊重。我成日覺得,尊重,先於愛,亦都係同愛一樣咁重要。

仲有⋯⋯冷戰得耐咗,你都唔識落台。結果,想開口又驚瘀,又驚無面,冷戰變成唔知點開番口。仲衰。

冷嘲熱諷最討厭

冷戰有幾傷,其實你知嘅,不如,學吓有咩唔妥時鬧交啦。

首先,發生咩事都好,先冷靜。唔好即刻表達意見!但唔係等於冷戰!而係停一停,俾大家感受番自己先,再留俾雙方一點緩衝時間,給彼此一點時間,好好思考同回應問題。之後再出聲,鬧起上來先會變得有意思。

咁當然要注意用詞,說話最好直接了當,冷嘲熱諷最鬼乞人憎,只會火上加油!令人覺得完全不受尊重,有人際專家話,鬧交時最好用第一人稱表達觀點,例如「我覺得你傷害到我的⋯⋯」關乎你自己嘅個人感受。唔好扯到老遠。

仲要給對方說話機會啦,一係冷戰唔講嘢,一係得你講唔聽人講,兩樣都係最差做法。又,唔使下下分出對錯嘅!鬧交時,提醒自己意見分歧並不一定係誰對誰錯嘅問題,只係,看法不一致囉。和而不同,真心要慢慢學嘅。

總之,有啲人天天吵架依然相親相愛,吵架並唔一定是壞事(甚至是必然),學識點鬧交,學識開口但講會傷到人,反而仲可以是感情的緩衝呢。

撰文:恆
網上圖片