出爐帝后迎接新一課 陳山聰越級挑戰 撩江美儀談情

陳山聰與江美儀齊齊「撈起」攞意頭。
陳山聰與江美儀齊齊「撈起」攞意頭。

出爐視帝陳山聰與視后江美儀分屬好友,惟多年來鮮有機會合作,最盡只是演哎吔親戚,2人寄望兔年關係更進一步,攜手合演愛情故事冧觀眾,實行雙劍合璧創收視高峰!

陳山聰與江美儀本月初齊齊「升呢」,開齋成為無綫視帝、視后,為虎年畫上完美句號。踏入兔年,2人希望運勢持續向好,山聰寄望「造人」成功兼生女,湊個「好」字;單身的美儀則享受自由,不急於尋覓另一半,認為欲速則不達,現階段搵錢最重要。

入行超過廿載,近日終雙雙迎來事業的春天,山聰認為是邁向成功的第一步,會暫時把視帝名銜放下,繼續拚搏,實行低調做人高調做事,他感性說:「我哋攀山越嶺過,經過好多苦先至可以有今日嘅成績,因為經歷過好多挫敗,依家更懂得珍惜。」同樣經歷過低潮的美儀,認為獎項來得合時:「如果當年攞完女配角好快就攞呢個獎,我可能囂多幾囂,覺得自己無限大,分分鐘已經消失咗喺呢一行。」

10年拍檔變跑友

在外界眼中,山聰與美儀看似大纜扯唔埋,但其實私下Friend到爆,經常聚會之餘,更是跑友一族,剛巧今年一同踏上頒獎台,可謂別具意義!美儀憶述10年前與山聰拍劇結緣,其後久不久在飯局碰面,至近年因跑步才多接觸:「估唔到仲可以一齊攞獎,好開心,之後會約埋大班朋友一齊慶祝。(攞咗呢個獎有咩轉變?)我覺得係人生另一頁嘅開始,人哋對你有個肯定,另一方面對你要求亦高咗,所以係一個新嘅功課,一切歸零,重新開始。」

山聰去年一口氣有6套作品播出,美儀則以演技感染無數觀眾,今年又想有甚麼挑戰?山聰表示角色上還有很多發揮空間,又搞笑表示想與美儀合作,趁機偷師,美儀提議演他的母親,山聰說:「家姐得唔得呀?情侶都得,我都拍過陳秀珠嘅。」美儀爆笑說:「但你之前係我哎吔女婿喎!喺《隱形戰隊》我演劉穎鏇媽咪,你哋有感情線,咁咪好亂囉!」

大利是有福同享

2人同於傳統家庭長大,講到新年習俗即雞啄唔斷,山聰說:「自細受爸爸影響,年廿八一定用碌柚葉抹晒成屋,之後準備新床單、內衣褲同新衫,大年初一就唔洗頭、掃地同倒垃圾,要等開咗年先可以做。(今年利是特別大封?)餡唔係主角,係數量,但都係福嚟嘅,所以冇所謂,太太已經幫我準備充足,Jaco(兒子)都有幫手入利是,佢覺得好新奇,玩得好開心。」美儀則分享童年回憶中的椰汁糕:「細個跟媽咪去食雲吞麵,一定會嗌椰汁糕,後來間舖淨係做呢個糕,每年新年,我一定買一底煎嚟食。」

踏入新一年,陳山聰與江美儀滿腹大計,有錢齊齊搵!
踏入新一年,陳山聰與江美儀滿腹大計,有錢齊齊搵!
陳山聰搵囝囝幫忙入利是,將福氣分享出去。
陳山聰搵囝囝幫忙入利是,將福氣分享出去。