出道就係女主角 關詠荷為家庭放棄演戲 曾被傳搵7個碩士幫女補習

今日有報導指，關詠荷(Esther)嘅胞弟早前喺城門水塘失足墮下傷重不治，關詠荷傷心之餘仲要處理家人後事，無奈丈夫張家輝有片約在身，只能陪伴幾日就要北上開工。

親弟離世，關詠荷難免傷痛，更何況Esther向來家庭至上。過去Esther更公開表明即使唔甘心，事業與家庭之間都一定揀家庭。

關詠荷除咗入行後短時間做過茄喱啡之外，由亞視到無線，大多數劇集都係演女主角。2003年關詠荷同拍拖11年嘅張家輝結婚，婚後努力「造人」但經歷2次流產，後來喺2006年以42歲之齡誕下女兒Brittany。

曾經係TVB首屆視后嘅關詠荷，2007年回巢幫TVB拍處境劇《同事三分親》，劇集反應唔錯於是添食100集，但關詠荷拍到2008年3月就宣布辭演。後來佢喺電台節目解釋係因為要照顧當時只有2歲嘅Brittany。後來關詠荷都只係喺2009年同2013年再返TVB拍《五味人生》及《情逆三世緣》，而《情》更加係暫別幕前之作。

專心湊女嘅關詠荷曾經被傳為當時讀緊小學嘅Brittany安排大量興趣班之餘，仲搵7個碩士學歷嘅補習老師，更加「孟母三遷」為入名校而搬屋。Esther承認有搵補習老師，但絕對冇7個咁多，只係主科先至搵老師幫手督促功課。佢又認為湊小朋友當然有大量活動安排，總好過日日坐喺屋企睇電視。

關詠荷同張家輝有共識個女要有創作力、禮貌同道德，幾年前Esther受訪時提到，即使張家輝冇鬧過個女，但係個女覺得爸爸惡啲。而家16歲嘅Brittany早前仲被拍到出街撓住家輝，似乎關係唔錯。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！