切勿亂 「政府回購」

星島日報

【星島日報報道】冇腦低端政客,不時有反智提議及口號,例如:不遷不拆(大佬,咁個城市點發展?)、政府回購(保證你效率急降兼蝕死納稅人!)。呢類戇居思維,專針對「賴依芙」選民,擺明呃選票。

若有讀過下書,毋須高深,只是中學的經濟及公共事務課程,已話你知,凡是商業運作,政府參與,必死!最新例子,正是食物環境 生署,被申訴專員公署大棍一扑,力斥其對街市經營不善,搞到五年蝕十六億元(嘩嘩嘩,若在商業機構,早已「人頭落地」!)。其中有五個街市三至五成攤檔擺「空城計」。最大鑊,元朗同益街市因滲水而空置二十八檔長達二十三年(點解仍然無人需要出來問責燉冬菇?)。食環署,根本日日在開大水喉,將庫房應得的收費亂咁浪費。

為何會如此?小弟曾是長達三十六年的公務員,當然知道政府員工的心態、文化及價值觀,一切,與商業世界模式,完全兩樣。讓我重溫公務員的行事作風及思維畀大家認識下:

一、程序為本、目標為次:一切幾大依足程序做。慢?冇問題(最多畀人鬧)。被窒官僚?冇問題。總之一切按章而行就唔會死人。目標?排到最後,若依足程序而達唔到,冇人可以怪你。反之,若為達目標而多多創意(Think Out Of The Box),以及走捷徑,又或靠不正常程序及關係,咁就死得,分分鐘監都有得坐。

二、政府工冇搵錢文化:公務員絕不以牟利為工作目標,亦冇受過營商訓練,更冇人會追數,所以,街市檔位租唔出,關人個關。滲水?咪等佢滲完先算囉,反正租得出又不是有花紅分。再煩,阿叔告病假,咁就玩死上司!

全世界公務員一樣,佢入職難,但你炒佢就更難,不少一入侯門就變冇效率小官僚。你大大聲高叫「政府回購」?哈哈,若真的,唔死就問我!

阿碌開咪 曾智華

專欄

其他內容