雅虎香港新聞 【判決前夕】黃浩銘：重溫未婚妻的21封信
2014年雨傘運動9人被控公眾妨擾罪，案件明天（9日）宣判。自審訊結束後已經近四個月，9人明天將在庭上再聚首。九子之一的黃浩銘，將可能是第三次入獄，他覺得：「如果大家都無心機關心嘅，咁我哋嘅坐監就變咗完全無意義，就係白白犧牲。所以我希望香港人唔好忘記初衷，就係當初話我哋要真普選。」他最難忘的，除了社運初衷，還有未婚妻的21封信。
眾新聞在判決前夕訪問九子，問及各人近四個月的經歷、面對可能入獄的準備、裁決對香港的意義。其中陳淑莊與鍾耀華不欲受訪。以下是黃浩銘的回應：
審訊結束（12月14日）至今近4個月，怎樣運用這段裁決前的日子？
日常要做嘅工作，包括有落區宣傳、關於社會議題的，例如有講過反對長者綜援由60歲推到65歲，又例如財政預算案，或者而家講修訂《逃犯條例》，我都有做呢啲嘢。主要都係做政治或者社會議題嘅宣傳。我照過正常生活。
4月9日有可能還柙，做了甚麼準備？
有、有、有，譬如我執咗6個月嘅書，如果超過6個月嘅刑期，就題外話啦，都唔緊要啦。6個月嘅書，一啲政治經濟學、憲法學、有啲人物傳奇，譬如曼德拉、馬丁路德金，經濟學其實都係馬克思主義嘅，你可以話係哲學嘅，我讀馬克思嘅政治經濟學，如果你話憲法學，我就係讀中國自由派學者，譬如最近許章潤，即係寫公開信畀習近平嘅清華大學學者。我睇呢啲，我想睇中國裡面比較自由派嘅學者，佢哋點樣睇憲政。平時睇得慢，入到去就多啲時間，咁我咪多啲時間睇，係好事嚟嘅對我嚟講。
又譬如我未婚妻寫畀我嘅信，我之前坐監，佢寫咗21封信畀我，我就執番晒出嚟，然後再印一次，然後叫佢遲啲再寄入嚟監獄俾我睇。我想睇番佢以前寫咗啲咩，再回憶。
今次係第三次坐，未婚妻唔使安慰，佢安慰番我轉頭。佢同我一齊今年第13年，結婚拖咗兩年，等我完成埋呢次嘅刑期先，預計坐1至2年。（未婚妻多次面對你入獄，所以較坦然？）我諗佢比較好嘅就係好堅強，佢又無喊，我哋完全正常生活，我諗如果到真係分開嘅時候，我哋會唔捨得，但係⋯⋯但係我諗第一就係佢都支持我啦、第二就係都明白大概嘅情況同埋有經驗，所以喺情緒方面佢係OK嘅。
（聽說你整咗《入冊指南》畀九子？）係有一個小組，當中譬如包括黃之鋒佢哋，我哋會有一個小組去整一本嘢，當然寫嘅係我，但佢哋都有份參與、畀意見，嗰個叫《白手指南》，白手嘅意思就係第一次入獄嘅人。
你覺得裁決對於香港社會的意義是甚麼？
我覺得嗰個意義唔係我講，係香港人講。
如果呢個裁決係令到香港人更加懼怕或者唔出聲，咁呢個裁決嘅意義就係令到我哋噤若寒蟬、令到我哋沮喪，亦都對我哋嚟講無乜嘢正面嘅意義。但係如果我哋香港人係不屈嘅，呢個裁決就調番轉頭，因為我哋頗強嘅抵抗，同埋一個堅定嘅意志，或者一個坦然嘅心態、心境去承受呢個所謂嘅苦難。然後我哋透過咁嘅情況，可以鼓勵到其他香港人繼續鬥爭、繼續關心社會，我覺得佢就會有真正嘅意義。
所以裁決有咩意義，唔係我一個可以畀到，係全香港畀嘅。如果大家都無心機關心，咁我哋嘅坐監就變咗完全無意義，係白白犧牲。所以我希望香港人唔好忘記初衷，就係當初話我哋要真普選，而家我哋無，我哋要繼續努力去爭。即使今日嘅環境唔係咁理想，社會氣氛好淡、好多人灰心呀，但係我哋都繼續要去作戰，守住呢個燭光，直到多啲人意識到我哋無咩退路。我哋唔知道因為今日嘅緣故，成功定失敗，所以我哋會努力。
觀看原文： 按此連結
