前夫票選「百大靚女選舉」結果出爐！COLLAR包辦頭3名 花姐被讚世一

女團COLLAR喺1月出道嗰陣已經氣勢如虹，一班鏡粉嘅「前夫」就喺FB成立新群組「前夫反擊戰」，當時唔夠一日就有逾2.6萬人加入；近日群組又有新搞作，舉行「前夫百大靚女選舉」選出10名前夫最愛，賽果亦於16日出爐，仲加設咗4個特別獎項。

選舉共有30名女藝人獲提名，COLLAR全團入圍之餘，名單仲包括ViuTV旗下藝人沈殷怡（Shirley）、練美娟、咖哩（黃雅慧）、3妹（郭嘉盈）、阿蛋（黃詠霖）、Mei Mei（曾美欣）、Elka（鄭芷淇）、Natalie（何榛綦）、Sica（何洛瑤）、Yoyo（葛綽瑤）；「試當真」成員Jessica（陳苡臻）、吳家忻（Kayan9896）及「Dee姐」陳海寧、鄧麗欣、吳海昕、劉沛蘅、陳凱詠（Jace）、阿儀（薛影儀）、鄭秀文、花姐（黃慧君），本身仲有七師傳及阿妹（黃敏蕎），不過基於七師傳係馬來西亞人，而阿妹未滿18歲，二人就被取消資格。

前夫可以喺候選人照片按「心心」，每人投票次數不限；而經過一輪投票後，10名前夫最愛靚女由COLLAR成員Day、Ivy So、Candy包辦頭3名，而第4至10名分別喺沈殷怡、鄧麗欣、芯駖、Jessica（陳苡臻）、Yoyo（葛綽瑤）、劉沛蘅及吳海昕。花姐喺候選期間曾一度力壓三甲女神，亦有大量網民留言力撐，直指「花姐世一」、「無得輸」、「完勝」等等，可見受網民愛戴，而花姐最終得票第3，但大會表示排名唔包括花姐，特別為花姐頒發「2022民間前夫or前妻最喜愛獎」，表示：「感謝佢製造左咁多歡樂俾大家，曾經你批評Candy係得個樣，而家票數反映咗原來Candy都冇你咁靚」。

咖哩（黃雅慧）得到「2022前夫最愛最有魅力大獎」，而得獎條件係冇加入女團，冇同任何公司簽約同最受前夫歡迎；Kayan9896和陳凱詠獲得「2022黑肉靚女獎」，大會補充：「邊個話黑就係工人姐姐？黑不知幾正，有質素嘅人先識得欣賞」。至於無被提名嘅阿Wing（戴穎）、Alice都奪得「2022最多前夫問點解佢唔係候選人獎」，大會就解釋指：「因為你哋唔提名囉，戴穎靚就唔使多講啦！Alice真係慘慘豬，好多前妻走去屈佢做小三」。

「前夫百大靚女選舉」結果如下（排名不包括得票第3花姐）

第10名：Sofiee吳海昕
第9名：Hillary劉沛蘅
第8名：Yoyo葛綽瑤
第7名：Jessica陳苡臻
第6名：Sumling李芯駖
第5名：Stephy鄧麗欣
第4名：Shirley沈殷怡
第3名：Candy王家晴
第2名：Ivy蘇雅琳
第1名：Day許軼

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！