前DJ蘭茜開畫展 西瓜刨爆牙消失 做文藝闊太住跑馬地

尖沙咀文化中心向來有唔少畫家同藝術愛好者開個人展覽，近期有個展覽《茜茜個人書畫展》居然有唔少娛圈人現身撐場，因為參展畫家「茜茜」正是前DJ蘭茜（簡詠嫻）！

退隱幕前多年嘅蘭茜原來學習書畫創作20年，畫展一次過將作品晒冷，而蘭茜造型打扮都充滿氣質，同以前巴喳搞笑形像截然不同。

90年代商台捧紅唔少DJ，蘭茜係其中一位，當年佢嘅節目裡面嘅《蘭茜夫人劇場》搵齊四大天王錄廣播劇，鋒頭一時無兩。後來蘭茜跳槽新城，又參與幕前演出，最經典可能係喺《獎門人》鬥快食西瓜，用佢一棚哨牙KO對手，仲因此被曾志偉賞識一齊做《獎門人》主持。

2003年左右蘭茜離開電台，曾經做過公關，據知佢2004年同男友Johnny結婚，婚後蘭茜搬到跑馬地豪宅居住。淡出幕前之後，蘭茜2006年重返校園，喺中大攻讀人類學系碩士課程。

早年有傳媒報導，蘭茜老公同一位富婆關係密切，亦甚少見到蘭茜同老公一齊出入，就連個人IG都好少post家庭照。感情生活成謎，但係社交方面依然活躍，畫展當日撐場嘅有當年《掌門人》常客鄧兆尊、劉曉彤同吳家樂，商台舊同事阮小儀、Donald、黃志淙等。蘭茜同商台舊同事郭靜及Vani更不時茶聚，主持早晨節目嘅Vani舊年更加搵到蘭茜出山客串節目。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！