劉以達當年登廣告搵主音拍檔 竟然遇著未出道周慧敏同草蜢兄弟

劉以達近期喺facebook連載「方丈尋根記」，唔止係達哥嘅音樂事業回憶錄，亦可以話係香港80年代樂壇寫照之一。最新一篇提到，劉以達喺音樂雜誌登廣告搵主音之後，收到十幾個人約見，當中竟然有人多年後成為樂壇偶像！

達哥提到應徵者不乏「路人甲乙丙」，即係見完都無印象，亦有部份人令佢印象深刻，其中一個達哥叫佢「阿金」，因為對方造型係「全套黑皮褸皮褲皮靴，皮褸鑲曬金釘，上下掛滿手指咁粗鐵鏈，叮鈴噹瑯行入嚟」，睇到達哥滴晒汗。

另外有對兄弟去band房試音，被形容為80年代日本偶像近藤真彥咁款嘅美少年，阿哥自我介紹時話佢地唱歌跳舞幾唔錯，細佬仲想整個一字馬！到試音時，劉以達形容呢對兄弟歌藝唔錯，但風格似日本偶像男團，同佢想做嘅英倫電子風唔多夾。而呢對兄弟原來係他日成為「草蜢」成員嘅蔡一智同蔡一傑。

當時都有女仔去試音，有一個「睇落似中學畢業，斯斯文文眼大大，梳個瀏海直髮，周不時向你整個純過蒸餾水嘅淺笑，神態慧黠之中又帶點楚楚可憐，對答反應又好機敏」嘅女仔出現，一句講晒就係「永遠嘅初戀情人feel」，至於聲線亦係日本少女偶像嘅甜美。不過呢個女仔原來並唔係要同達哥組團，而係唱片公司安排，後來個女仔做咗DJ，再做埋歌手。呢個女仔，係周慧敏。

好多樂迷都期待緊，到底後來同達哥組成「達明一派」嘅真命天子黃耀明幾時出現。文章後段達哥提到，有日整緊隻新歌嘅時候收到電話，對方介紹自己係「商台嘅黃耀明」，然後就完嘞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！