劉佩玥命懸一線 倒車險墮河

劉佩玥今次有驚無險,執身彩!
劉佩玥今次有驚無險,執身彩!

無綫小花劉佩玥(Moon)前日在郊外因倒車時疏忽幾乎連人帶車墮河,幸得拍檔丁子朗大聲喝停才制止意外發生,事後她發文講述事件經過,引來海量「責罵」聲,包括劉媽媽、圈中好姊妹何雁詩、蔣家旻,連緋聞男友周志文也忍不住要訓示!

入行7年的劉佩玥向來多蝦碌事,3年前她學揸電單車,上堂期間突然失平衡跣落地,結果被電單車壓傷左腳;上月的無綫台慶夜,她於台上戥陳曉華中大獎興奮時,又不慎差錯腳仆親。直至前日,她更大懵得險出大事,話說她為無綫新劇《把關者們》到新界拍外景,親自揸車到場,準備倒車停泊時,因未有留意近在咫尺是河流,幾乎出事。

黑白相「報平安」

昨日她於社交網上載黑白相,僅見河邊及車尾,透露險些連人帶車跌落去:「如果唔係丁子朗及時叫停我,我會連人帶車跌咗落去,好似啲電影咁慢慢沉落水底!感謝神,英雄在身邊,多謝你呀丁丁!」還附加喊樣Emoji,似乎她也自覺驚險。及後她受訪時直言發文本欲表揚丁子朗,沒想過卻收到海量的擔心留言,引起網友關注,為讓大家安心即派定心丸:「我真係一啲事都冇,但好多Message鬧我,媽咪睇到新聞嚇死佢,一個圈外女性朋友打嚟不停鬧,知我冇事之後就笑我,啲姊妹車輪轉咁轟炸我,蔣家旻笑我又做傻事,何雁詩就問我搞咩!(緋聞男友周志文呢?)佢見我留言都有話咗兩句,都擔心,始終駕駛意外係冇人知,多謝佢問候。」

「踩多下油就跌落去」

談到事發經過,Moon指當日天未光就開工,駕車到達目的地時要倒後車,當時倒後鏡及泊車感應器也未發現任何東西阻擋,未幾卻見到丁子朗落車:「佢突然好大力咁用手揮動,我仲以為佢見到我咁開心,當下停一停想回應佢,點知佢就大叫我唔好再倒車,把聲大到我隔住玻璃都聽到,我先如夢初醒!佢話我再踩多下油門就會跌落去,我落車睇番原來個位係咁近(河邊)同下面咁深,就真係識驚!」她更指今次大難不死,之後駕車定必打醒十二分精神。

而丁子朗表示當時對方的座駕停泊於他旁邊:「見到佢架車慢慢退後,但後面係崖嚟!佢話架車detect(偵測)唔到,我就喺隔籬,本身都啱啱瞓醒,但見到佢咁樣即刻醒晒,落車拍佢架車叫佢停,如果唔係真係連人帶車跌落去……慶幸冇事發生,大家仲醒晒添!」

劉佩玥po黑白車尾照,表示差點沉落水底。
劉佩玥po黑白車尾照,表示差點沉落水底。


【相關搜尋】劉佩玥周志文疑秘戀