劉悅：我實在太有型！

劉悅憑ViuTV劇集《地產仔》秘書Carmen一角成功入屋，外表高冷的她性格卻相反：「其實我個人好熱情，好容易同人傾到偈，係傻大姐，因為笑點好低，人哋講咩我都好易笑。」擁有高挑身形、修長美腿的她，原來一直想做模特兒：「我覺得自己雙腿好長，條腰好幼。我鍾意着靚衫影相，又想試好多唔同造型，想行天橋。」開始拍戲後，劉悅覺得可以在演藝方面發展，為演好角色還去讀演藝班，她說：「之前跟甄詠蓓老師上咗10堂演藝課程，我做戲時可以好放，老師都話肯放肯豁出去已經好好。」

唔介意做諧星

作為新人如何突圍？劉悅說：「我靠型格、高冷嘅面孔。講靚，娛樂圈有好多靚女，但重要係有自己style，有氣質。我淡妝同濃妝都得，可以好百變。」劉悅認為自己戲路可以很廣，性感、打女、殺手，就算諧星也可以：「如果靚女去做諧星，個反差咁大，都幾好睇。愛情片都OK，但要搵個高啲型啲嘅男星，因為我實在太有型。唯一覺得鄰家小女孩角色唔係咁適合，好難扮楚楚可憐。」

劉悅最欣賞的圈中男星是古天樂，她說：「有機會當然想同古仔合作，覺得佢係好認真嘅演員，靚仔又有內涵。另外好想同金城武合作。（唔係你個年代？）因為佢真係好靚仔，我睇好多以前香港舊嘅戲，好鍾意佢。」