劉詩昆曾兩次婚姻失敗 孫穎無懼36年忘年戀：佢嘅童心億金難買！

79歲嘅劉詩昆同43歲嘅孫穎愛情故事，從藝術譜出真感情，4年前二人正式公開戀情，呢段年齡相距36年忘年戀對佢哋嚟講並冇難度，佢哋思想言行一致，一生中難得遇到的靈魂伴侶，他倆真情剖白。

劉詩昆：「我找到孫穎以後，我覺得整個人生，特別是人生中的愛情、婚姻劃了一個最完滿的句號，現在已離不開她，除了感情，還有親情和愛情，我所做的一切都離不開她，做甚麼也會告訴她，每天不在一起，我們會打很多次電話，一、兩小時便會打給她。」劉老師笑指現時大家嘅關係已過咗甜言蜜語階段，經歷過兩段不愉快婚姻，劉詩昆話：「認識她（孫穎）之後才知道最好的感情是甚麼，以前不太明白。」

孫穎則謂36年嘅差距對佢嚟講啱啱好，佢話：「佢年紀對我啱啱好！我同老師思想上深度溝通，慶幸有機會兩個人喺藝術世界、現實世界中建立咁深厚嘅感情，年紀唔係問題，反而兩個人思想係大基礎，要互相配合。」孫穎仲冧爆指大家係天生嘅靈魂伴侶，佢話：「呢句說話我覺得好貼切，年紀細嘅時候感覺唔到咁深入，但老師身上嘅純真，尤其係童心真係億金難買，生活中帶畀我哋好多快樂，對我嚟講我係好需要精神上嘅燈塔，一位男士無論生活中幾艱難困苦，內心都咁靚，好童真去面對，好難諗冇咗呢個燈塔力量嘅感受，境界高於兩個人嘅相處，真係二合一。」

至於會唔會考慮結婚，孫穎話：「我哋都探討過，呢樣只係形式、儀式，我哋唔看重，冇需要。我哋互相呼應、欣賞，係真正靈魂伴侶，記得之前老師哮喘入院，姑娘問我係老師邊位？我同佢講我係佢嘅靈魂伴侶，姑娘唔畀我入去，可能佢覺得我係癲，好好笑。」