力保100磅身形 蘇皓兒力抗甜品誘惑 睇咗當食咗

東方日報
·2 分鐘文章
蘇皓兒站於甜品櫃前良久,最終忍口冇幫襯。
蘇皓兒站於甜品櫃前良久,最終忍口冇幫襯。

新一代「宅男女神」蘇皓兒日前到百貨公司入貨,面對甜品的「邪惡誘惑」,她幾經掙扎才成功忍口,為保100磅身形,睇咗當食咗,女神果然唔易做!

新一代「女神」蘇皓兒(Chloe)最愛到日本掃貨,但因疫情關係,足足1年未有離港旅行。早前她開工後到九龍灣一間百貨公司Shopping鬆一鬆,先到化妝品區「補給」,選購了粉底、卸妝用品、護膚品等,隨後經過零食區。近期接拍不少廣告的她,為保持100磅纖瘦身形,只齋睇冇買。當去到甜品櫃,她即面臨最大考驗,站在甜品櫃前徘徊良久,顯然心大心細,不過最後戰勝心魔,睇咗當食咗。

好想去旅行

去年Chloe拍攝無綫劇《那些我愛過的人》後人氣急升,即獲邀拍攝美容院廣告,今年亦有銀行、護膚品廣告邀請,稍後還有2齣電影上映,工作長做長有,認真有「錢」途。事後她受訪時表示希望疫情盡快過去,可以旅行玩餐飽:「工作幾忙都會有啲空檔,或者做完啲艱辛工作都想離開一陣,去旅行放鬆吓,當然會順便入貨,好似去日本買化妝品,因為平過香港。」

「放假會放肆少少」

談到被拍得忍口唔敢食甜品,她笑言:「因為一路都要Keep Fit,每朝會上磅監察體重,肥2磅就好易減,如果肥咗2kg先減就好難減,唔可以畀佢一發不可收拾。不過放假都會放肆少少,食少少零食,會呃自己食薯片唔肥,哈哈。」

蘇皓兒細心選購化妝品。
蘇皓兒細心選購化妝品。