勁騎26｜Alton克服障礙清潔毛孩屍體令網民改觀 節目獲激讚高質有意義

ViuTV節目《勁騎26》由MIRROR成員Alton（王智德）主持，節目除咗為觀眾介紹不同種類嘅電單車及邀請鐵騎士作客講車經之外，噚晚嗰集仲講到Alton與「浪浪送行者」義工揸電單車喺街上及馬路上幫助不幸往生嘅毛孩。節目出街後，節目及Alton獲大批網民激讚。

喺噚晚（2日）播出嘅《勁騎26》第六集，Alton跟「浪浪送行者」善終義工阿峰和Sammi了解過程，之後便揸電單車前往發現不幸往生毛孩嘅地方，包括疑被毒死嘅貓仔，及喺河邊死去幾日，身體已經腐爛兼傳出臭味嘅狗仔，期間Alton克服障礙，表現冷靜又細心咁執拾及幫毛孩屍體清潔，令毛孩可以有尊嚴咁走最後一程。

節目播出後，「浪浪送行者」亦有喺Facebook專頁分享拍攝後嘅感受：「每次當浪浪送行者拍攝完訪問，我地都係懷著感恩的心，希望透過行動可以感染更多人可以幫助那些可憐在路上不幸往生的毛孩。今次同 Alton 拍攝既過程都算順利，但坦白講我地係無諗過一個完全冇接觸過浪浪屍體、平時會怕污槽既Alton，去到求助現場既時候係完全可以克服到佢心理障礙，而且仲主動落埋好多蟲既河幫手。」

同時，「浪浪送行者」亦上載一段小插曲嘅影片，片中Alton默默企喺受傷狗狗身旁，義工指佢哋同ViuTV節目團隊分別20分鐘後，佢哋收到節目團隊電話，表示佢哋喺路上遇到比的士撞倒嘅狗，義工到場後Alton主動幫忙，令義工感到非常感動：「拍攝完左之後，發生左一段小插曲。團隊同我地喺善終公司分別20分鐘後，我地收到Viu 團隊既電話求助。原來佢地喺路上咁啱遇到一隻狗比的士撞倒，前面已有一位先生停低左車。因為人為既疏忽，狗狗突然衝出馬路，的士收掣不及。為左避免其他車再輾過狗狗，團隊即時停車擋路，及打比我地問可唔可以幫手。我們收到求助後即時前往求助點。 到達現場後，送行者峰即時搬狗狗到行人路上，而Alton 就即刻衝向送行者架車既尾箱拎所需要既Gear。當佢拎住浪浪送行者個箱跑返過黎既時候，我好感動。因為Alton 唔係為拍攝而拍攝，佢係牢牢咁將我地接收往生浪浪所需要既物品、程序一一記住。 再落手幫手清潔，到最後知道所有野settle 晒先離開。 在此，我想再同Alton 講一次，好榮幸你參與左1日送行者工作，希望無嚇親你。」

節目出街後，唔少網民大讚節目有意義及指Alton做得好好、好善良及對佢改觀，例如「Alton 真係好善良～但都要注意安全～」、「呢集我對Alton改觀」、「節目好精彩，現在先了解到你哋嘅工作，真係好有意義！感謝你們嘅付出！Alton 真係值得一讚」、「Alton 好叻 你地都做得好好 生命教育～ 多謝你地」、「Alton 感恩你能陪狗狗最後一程 浪浪送行者非常感謝你們無私奉獻」、「感謝製作團隊嘅安排！感謝義工們的努力！Alton 也非常了不起，王勁嘅真情流露、真誠，都令人睇得好感動！ViuTV 應該俾更多機會王勁發揮！佢真係越睇越charm!」、「呢集真係好感動！好有愛」、「今集真係好高質！好感動」、「呢集不是嘻嘻哈哈，非常有教育意義，Alton很勇敢！」、「我對 Alton Wong 王智德 又加分喇！ 佢真係記入心，唔係為做節目而做。 謝謝 #浪浪送行者 同 #Alton Respect」、「Alton 真係值得一讚，100 分，心地善良，更加感激浪浪送行者，睇完好感動」及「無諗過一個講電單車嘅綜藝節目可以咁有意義！制作組拍得好好，觸動人心，ViuTV 永遠都帶到好多驚喜比觀眾！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！