勇悍11歲仔 力保屋企部PS4 用開山刀斬賊佬

 

呢期成日聽到「勇武」。捍衛自己嘅利益,嗰份力量有幾勁?勁到細路到揸刀呀!   美國北卡羅來納州嘅11歲仔Braydon,有日一個人喺屋企嘅時候,有賊人準備入屋偷嘢。   賊仔見到屋內得一個細路,以為實食冇黐牙,拎起搵到嘅氣手槍指嚇Braydon,搶去佢嘅手機,仲要佢匿入衣櫃。   好在Braydon仔都係醒目仔,趁機喺衣櫃走出嚟,隨手拎起把開山刀,一嘢劈落賊仔個頭。之後一番打鬥,賊仔發現唔夠打又爆晒缸,唯有放低偷到嘅電視機同PS4,拿拿聲走。   成個過程,本來同Braydon講緊電話嘅媽媽都聽到,你諗下Braydon媽會有幾驚?   19歲嘅賊人之後去醫院求醫,但係警察想等佢出院先拉人,結果俾佢走甩。(咦,咁似呢期新聞討論嘅「醫院拉人」?)   Braydon事後受訪話,爸爸教過佢如果有人搞你屋企,就要還以顏色。Braydon唔止做得到,而且非常冷靜,即使見到支氣手槍,都冇慌失失—因為佢清楚知道,支槍根本無子彈。   警察都讚Braydon夠硬淨,但都提醒公眾,冇出事都真係好好彩。   所以勇武真係要睇情況,不流血好緊要!但我相信Braydon真係好著緊部PS4囉!原文傳送門