北上搵銀吃盡苦頭 謝天華飲尿飲出半億物業

【星島日報報道】50歲的謝天華在13年離開無線後，便自組公司「拉風工作室（Laughing Workshop）」，並由太太Tina擔任經理人，肥水不流別人田。近年他主力北上賺人仔，前年兒子謝浩飛（天天）出世後，為賺奶粉錢更加瞓身「乜都制」，之前參與內地真人騷《跟著貝爾去冒險》，挑戰食蟲、食牛睪丸，更要飲尿，吃盡苦頭！ 不過謝天華苦盡「金」來，付出換來可觀回報。《東周刊》發現謝天華短短幾年間，已賺到市值約5千萬元的物業。日前，他難得空檔放假留港陪妻兒，被發現駕駛「綿羊仔」出動「兜風」，又去了買頭盔、滑雪裝備等心頭好。正所謂「Work hard，play hard！」實行「獨自去偷歡」，趁機鬆一鬆。 近年北上搵食的謝天華，為了豐厚酬勞，前年在內地真人騷《跟著貝爾去冒險》中玩重口味，噁心食蟲、生吞牛睪丸，更要飲尿，每張人民幣咬開都有血、有汗、有眼淚。加上，他密密做到冇停手，拍劇、拍戲、拍廣告、商演，連夜場登台騷都照接，密食當三番。終於，一家人前年「細屋搬大屋」愈住愈豪，斥資3千7百幾萬，購入大坑優雅閣1個1千7百呎單位，再揼本3百萬元豪裝，粗略估計約4千萬元埋單！ 有數得計，去年謝天華拍住鄭伊健、陳小春等「古惑仔」，走演了21場世界巡迴演唱會後，又孖住好兄弟拍錢嘉樂執導的電影《黃金兄弟》；然後，又有《風雲5D音樂劇》的中港兩地演出，保守估計他年袋逾千萬，供樓、供車、供囝囝讀書，都綽綽有餘。難怪他除自住物業外，另有1個位於北角清華街的地舖，作長遠收租投資，兩物業揸手市值約5千萬元，認真富貴。

睇更多