雅虎香港新聞 【區選打大佬】「機場大叔」陳振哲空降大埔林村：我哋呢代要還
47歳的「機場大叔」陳振哲是區議會選舉大埔林村谷候選人，挑戰獲得鄉事派支持、已做了3屆區議員的經民聯陳灶良。記者訪問陳振哲當天，在林村一帶拍照期間，突然有一名男子趨前問可有拍片，大家急忙離去。記者問陳振哲怕不拍被打，他感嘆：「梗係怕啦。」
成日著西裝的陳振哲突然走入圍村，究竟他是何許人也？他正職做殯儀喪事，行內稱「棺材頭」。他擁有香港城市大學法學碩士（仲裁及爭議解決學）學位，在8.13機場衝突中，搬鐵馬攔住想衝的示威者，又嘗試阻警察進入機場，一頭銀髮成為當晚的直播紅人、「機場大叔」。
陳振哲自言未到收成期，但衣食豐足，今次參選完全因為反送中運動。「我哋呢代人欠咗下一代，我都40幾50歳，唔死都大半世，好似『波叔』（立法會財委會主席陳健波）講嘅收成期，其實係因為社會安定，上一代借取空間，佢哋做過乜嘢無啦啦發達？可能佢阿爸當年十幾萬買層樓，一升升到百幾萬，樓換樓，於是水漲船高，呢個係符碌撞棍，佢好叻咩，唔見得喎。佢收成，更加唔敢接受新嘢。借咗嘅嘢係要還，點還呢？我哋呢代咪行出嚟囉。」
時代選中他？
陳振哲的知名度來自以下三件事：
8月13日，網民發起機場「警察還眼」行動，他在機場酒店食完晚飯，行到機場看著警民衝突升温：「當刻唔驚，諗住as a mediator （調解員） 介入件事。」他用身擋警察與示威者，介入調停，後得「機場大叔」稱號。
9月28日，警方在紅磡隧道口設警崗截車調查，他說剛在紅磡殯儀館附近放工：「見到當時情景，抵唔住問警方：『點解可以查車？』有個白衫警司解答後，另一個綠衫警司一輪咀咁鬧，我問點解佢無編號，佢話佢叫鍾雅倫，係紅磡區指揮官。」
11月2日，128名區議會選舉候選人，在銅鑼灣維園發起選舉聚會，後來警方向維園發射多枚催淚彈，陳振哲與警方理論，結果被近距離噴射胡椒噴霧並按在地上，被捕後被控參與非法集結及阻差辦公兩罪，現獲准保釋候審。
陳振哲說：「我6月已參加遊行，當初好和平；7月已尋求點樣參選，我細個住廣福邨，一直都住大埔，所以諗住喺大埔。第一個諗法係唔好俾一啲人自動當選，又唔好自己𠝹票，所以要協調。我同大埔民主聯盟商量時，原來揀淨林村谷，通常無人揀都係豬頭骨。」林村谷選區主要是鄉郊圍村，橫跨幾個山頭，覆蓋大埔林村以及大窩西支路一帶，共30多條鄉村。「揸車由一邊去另一邊，都要20分鐘。」訪問當日，他準備逐戶信箱放競選海報。「素人無資源。有咩諗法？有咩勝算？去唔去呢？8.13機場之後，下定決心，死就死，去就去。」
「林村谷點解艱難呢？（對手陳灶良）好有選舉經驗，以前對番自己友，圍村人對圍村人、建制對建制；二來佢鄉事派，又係原居民，同村民熟。」上屆林村谷選區的投票率約有5成，選民超過9,000人。
雖然沒有圍村人脈和經驗，但陳振哲認為，反送中運動以來，年輕人的毅力和堅持，正好說明世上無難事。「圍村外來人口多，唔識嘅都嚟打招呼，我無做過咩驚天動地嘅嘢，只係覺得警察做咗違規嘢，咪問佢點解，好多市民想有人做代表發聲，詢問好一般嘅權利，警察兇我阻差辦公，佢哋就咁樣去攻擊人，我有啲法律背景知道呢個係我哋嘅權益，有啲優勢，我敢去講，要更堅定走出嚟。」
1990年代回歸前，陳振哲中七畢業後，加入當時的Big Six （六大會計師行）從事會計工作，前後10年。「做會計 entry barrier低，而且compliance 愈嚟愈多，回報愈嚟愈低。」當年他謀轉行，定下3個條件：「行業要本土，唔使返內地； market 要增長緊；entry barrier要高。」他經過一番篩選，發現殯儀業最適合，百無禁忌。「當年一個人都唔識，父母亦健在，唯有逐間敲門，由紅磡敲到和合石，搵到我師傅肯帶我入行。」他開始當「棺材頭」，專業啲就叫殯儀統籌 （Funeral Director），後又於2012年成立祿福禮儀學院。
「我入行好艱難，想令有興趣嘅人入行容易一啲，主要教introductory course。殯儀唔係單一工種，係一個行業，我只係擔任其中一個職位。舉例說殯儀花，唔只賣花，仲要好熟稱謂。試過有位先人有兩個女，一個女花牌寫父親大人，另一個唔係；佢鬧點解唔係寫父親大人，答案係因為佢嫁咗，就要跟老公寫，老公叫岳丈大人。有晒規矩。」
各盡本份，社會回復正常
殯儀業雖然冷門，但陳振哲為了提高競爭優勢，又見殯儀經常遇到需要調解的情況，於是報讀城市大學法律學課程，由副學士、學士學位，讀到碩士學位。「學士學位我主修警政及公共秩序，碩士學位係讀仲裁及爭議解決。如果我哋講緊警政，完全唔合格，警察無政策，維持治安係好闊嘅目標，要配合政策嘅執行。」
「好多衝突場面係confrontation，突然有個警察發難，衝咗過嚟，其他警察驚佢落單，唯有成隊衝過嚟做嘢，求其捉一兩個人，其實好多時都係前線警務人員不受控。例如尖沙咀水炮車那次 （10月20日），正常commander會唔會咁笨下令向清真寺發射？佢無落命令，得一個原因，就係佢command 唔到前線。另一個例子係中大嗰晚 （11月12日二號橋之役），水炮車嚟到，出晒新聞稿話 （警方） 撤退，都係照發射，亦證明commander 控制唔到前線。」
「呢個係警政經典嘅Broken Windows Theory （破窗理論）。而家就係管理層根本控制唔到前線，但前線做錯咩都唔鬧得，佢哋更加不受控。」
陳振哲這個又講專業又講理論的大叔認為，香港要收拾殘局，只需兩個字 — 歸位。「香港最大嘅問題係在其位者無做好本份。警察本份係咩？維持治安。」他以童話《北風與太陽》為例：「北風愈吹，人就愈著多兩件衫；太陽曬，人咪除衫，呢個道理小朋友都明啦。警察要維持治安唔係靠暴力，係要靠政策，警暴係唔能夠維持治安。」
「但警隊根本無維持治安嘅政策。以往大遊行，警方開條路俾你，有咩打交就全部拉晒，咁就叫維持治安。係人民做好本份，不與你為敵。」
區議會沒有作為？
「一個社會係由唔同嘅component 組成，睇少任何一個component只能表現你嘅狂妄與無知。區議會喺政府架構就有佢嘅功能，每一個部份都做好佢嘅功能，咪成個社會都好。」
「區議員基本職能係向政府提供意見，18區區議員有無提供過意見？佢哋只係做rubber stamp去endorse 政府嘅policy，佢哋唔係去聽民意，去將民意反映俾政府，呢個咪violate咗佢哋本位，佢哋無歸位，無做好本份。」
陳振哲記得，1997年前行三級議會制度，及至1999年，時任特首董建華提出解散巿政局，原來負責的衛生、文娛康樂等決策，改由新成立的食物環境衛生署、康樂及文化事務署等政府部門處理，民選議會變成不經民選的政府部門執行決策。「衍生咩問題？例如骨灰龕位係市政嘢，以前有市政局，市民可以就市政議題投票。而家只有區議會呢，贊成呢度起骨灰龕位嘅區議員，咪唔投佢；贊成起公屋，咪投囉。結果市政問題無法解決。」
陳振哲曾出任兩間中學的校董：「回歸前官校校長一入職就要做10年報告，看似無用，但就算攞住舊嗰份抄，都會睇一次，咁會知道未來10年人口趨勢、年齡分布，然後作出人手安排，知道社會變化會決定開咩科。透過做 （報告），可以practice，係training 嚟。」回歸後，該程序由時任特首董建華取消。
「林鄭嘅得勢係因為水鬼升城隍。1980年代，政府有人退休、有人移民，大學畢業入去做AO，坐直升機，佢叻？唔關事。佢哋上面跟過叻人，學唔到十足，跟住個殼做都唔死人，但又無教下面點解要咁，到林鄭佢哋又懶醒，有啲程序覺得無用咪唔做。好多係民意諮詢架構，淨係endorse政策咪死囉。管治能力咁差就因為咁。」
陳振哲修讀法律時，曾研修不同國家的政制模式。「英國管治模式係靠政策，譬如要減少柴油車、增加電動車，就定出政策措施，一架換一架，相關配套市場會走位；而家推電動車，政府就俾錢熟嗰個，花一大嚿錢，而家係靠執行，無政策。」
他相信，香港要回復正常，每個崗位的人都要做好本份：「做人唔使貪心，nothing more nothing less ，唔使強求，唔使做多，但唔好做少，其實已經好足夠。」
記者曾向陳振哲的對手陳灶良查詢，未獲回應。
觀看原文： 按此連結
