【十三短打】尼馬至係大賽最悲情

AL RAYYAN, QATAR - DECEMBER 09: Neymar Junior of Brazil celebrates after scoring his goal ,during the FIFA World Cup Qatar 2022 quarter final match between Croatia and Brazil at Education City Stadium on December 9, 2022 in Al Rayyan, Qatar. (Photo by MB Media/Getty Images)
尼馬(Neymar)

【Now Sports】估唔到咁快要同巴西講再見,亦送別世界轉會費最貴嘅尼馬。成日聽人講美斯同基斯坦奴朗拿度未贏過世界盃,不如講吓尼馬,唔計洲際國家盃、奧運金牌,查實一個冠軍都冇。
撰文:球十三話尼馬(Neymar)冇大賽運,由2010年世盃講起,當時18歲小伙子已經冒出頭,好多名宿,包括不嬲錫佢嘅比利公開呼籲應該召佢入大軍,偏偏鄧加覺得未係時候。巴西2013年贏過洲際國家盃,尼馬當選最佳球員,但外界一般唔會將呢個睇成重要大賽。

2014年,巴西喺自己地頭踢世界盃,尼馬擔大旗而且有好表現,好景不常到8強對哥倫比亞重創,緣盡賽事。巴西緊接喺4強俾德國大炒七個一皮,猶如國殤,聞戰鼓思良將,尼馬在陣唔代表巴西唔會輸,但有佢牽制,比數未必去到咁懸殊。

2016年,尼馬喺主場上演嘅奧運決賽,射入奠射12碼,為足球王國圓奧運金牌夢,流完開心眼淚咬住金牌影威水相,但相信連佢自己都諗唔到,呢個係佢截至呢刻,喺國際賽生涯嘅唯一威風。

兩年之後,尼馬再次踏上世界盃征途,但喺呢個賽事,大家對佢僅有記憶,可能係對比利時臨尾埋門扳平唔到,同埋被狠批喺成個賽事過份「插水」,網上流傳佢落地「碌」嘅惡搞片段,球迷應該總有睇過,笑晒。

「美C」都分別贏過美洲國家盃、歐洲國家盃。尼馬呢?2019年巴西係贏美洲盃,好衰唔衰佢大賽前友賽受傷,即係隊友捧盃,佢得個睇字。舊年同一賽事,佢帶領東道主巴西殺入決賽,可惜最後揚威馬拉簡拿,破大賽冠軍荒嘅係美斯。

今屆世盃,尼馬第1場分組賽又受傷,到淘汰賽復出兩場都有波入,點知森巴兵團對克羅地亞領先下俾人一次中框埋門就扳平,只差幾分鐘,平咗比利國際賽入77球紀錄(國際足協資料)嘅尼馬就係晉級英雄……最慘對方仲要係射12碼專家,死得!當洛迪高第1球就射失,鏡頭影住尼馬唸唸有詞祈禱,可惜改變唔到悲情命運。連第5球,睇怕都係尼馬主踢嘅機會都冇,賽後喊晒。家陣30歲,照計尼馬下屆世界盃仲可以捲土重來,但佢太浪子型,近年俾人感覺對足球熱情減退,4年後嘅事,邊講得埋。

咁啱得咁橋,尼馬第1場世界盃決賽周比賽係2014年對克羅地亞,最後一場世界盃比賽,會唔會就係呢一晚對克羅地亞?

撰文:球十三
足球迷叫第十二人,冇偏愛,冷眼旁觀係十三。