《十月初五的月光》胡鴻鈞何依婷為角色試造型 坦言擔正有壓力

·2 分鐘文章
《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)
《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)

由佘詩曼及張智霖主演嘅經典人氣劇集《十月初五的月光》,2000年出街時令「君好」佘詩曼及「初哥哥」張智霖人氣爆升,而主題曲《祝君好》亦唱到街知巷聞,就算而家一聽到「寧願沒擁抱共你可到老......」都識得接住唱落去。早前無綫落實翻拍《十月初五的月光》,並搵嚟胡鴻鈞及何依婷擔正,分別飾演「初哥哥」同「君好」,日前佢哋就為角色試造型。

兩位主角接受無綫娛樂新聞台訪問時,胡鴻鈞直言好緊張,不過同時亦都好期待,因為今次嘅角色好有挑戰性,需要學習手語。被問到進展如何,佢就話現時跟緊劇本去學,不過手語某程度上同日常生活好有關連,有時就算唔識都可以估到個意思,所以唔需要死記。

而飾演新版「君好」嘅何依婷接受訪問時就話胡鴻鈞經常欺負佢,同「初哥哥」呢個角色相反,戲內佢欺負胡鴻鈞,戲外就胡鴻鈞欺負佢,所以佢可以喺戲入面報仇。對於第一次擔正,何依婷就話知道嘅時候好開心,多謝公司,亦都好多謝監製,因為呢個係一個大膽嘅決定,不過佢會好比心機去演好呢個角色。

另外,前輩米雪及石修就話之前都有留意佢哋嘅表現,石修亦知道觀眾好期待呢一套劇,同米雪合作既開心又緊張,今次已經係佢哋第三次合作;米雪仲笑話唔會好似石修咁蠢去睇,佢已經直接向家燕請教。

《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)
《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)
《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)
《十月初五的月光》胡鴻鈞何依婷為角色試造型 坦言擔正有壓力不過好開心(無綫截圖)

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!