半工讀捱到畢業 劉穎鏇滿足阿媽 飛美國戴四方帽

劉穎鏇戴四方帽,父母當然高興。
劉穎鏇戴四方帽,父母當然高興。

無綫小花劉穎鏇1年多前完成美國大學課程畢業,最近專程飛到當地學校影畢業相留念。她不諱言兼顧學業與事業的確辛苦,但能達成父母心願成為大學畢業生,認為相當值得。

劉穎鏇(Tiffany)6年前為參選港姐毅然放棄大學生活,隻身從美國返港參賽,最後勇奪亞軍並加入娛樂圈,備受無綫力捧的她數年間已拍了約10部劇集及多個綜藝節目,但為完成母親心願,她2018年重返校園,於網上修讀加州大學河濱分校與亞利桑那州立大學的工商管理系學士學位課程,並於2020年12月底順利畢業。

相隔1年多後,Tiffany趁去年底完成新劇《隱形戰隊》拍攝,即啟程飛到美國。昨日她於社交網上載多張戴四方帽、穿畢業袍的畢業照,期間穿梭校園每個角落「打卡」,又與父母及親友合照,笑得相當燦爛。Tiffany留言感激親友成為她最強大後盾,令她得以順利畢業。她接受本報訪問時,表示今次返美主要是探望家人,其次是影畢業相:「之前去唔到畢業禮,得一張證書,冇一個真正嘅儀式,所以媽咪一直好想我返學校影啲相做紀念,所以同父母、舅父、表弟專登喺LA揸車去Arizona嘅學校,成件事好warm同開心。記得到現場着起件畢業袍影相,先感受到自己正式畢業,好耐冇試過去大學嘅教學樓,嗰度好大好靚,當日天氣又好,所以好滿足。」

獲力捧兩劇齊出

回憶當時要兼顧拍劇及讀書,她指過程辛苦,即使半夜收工也因趕功課而未能休息,但見終於孭住「大學畢業生」的名銜,認為付出也非常值得,更說:「見到父母個表情,佢哋應該都Proud of我完成到佢哋嘅心願,當然媽咪最開心,因為呢段時間可以陪佢周圍去,好耐冇試過。」談到參演的兩套劇集《鐵拳英雄》及《青春不要臉》即將推出,Tiffany透露預計本月底才返港,屆時還要接受隔離,故寄望疫情能快點緩和,讓她能趕及為作品宣傳。

身在美國的劉穎鏇,重返校園拍畢業照。
身在美國的劉穎鏇,重返校園拍畢業照。