印裔演員陳振華對抗鼻咽癌第四期神隱4個月拍新片 曝光最新情況
印度裔演員陳振華(Ricky)講得一口流利講東話,因而獲得唔少演出機會,曾於TVB 劇集《金宵大廈》飾演鄧佩儀男友「蛙蛙」而令人熟悉。不過,陳振華2020年被老婆Alison於社交平台公開其渣男行為,踢爆佢曾經偷食、虐打女兒及欠債累累等等,形象插水。去年8月,陳振華自爆患上鼻咽癌第四期,兩個月後決定暫停拍攝短片,休息抗癌;事隔4個月,陳振華藉農曆新年再次拍片為大家送上祝福,曝光最新情況。
陳振華去年8月拍片自爆「中咗獎」:「我中咗呢個鼻咽癌,咁都可以畀我中到,仲要係鼻咽癌第四期。」不過,樂觀地表示自己心態保持得好平穩,希望趕走癌細胞,又想藉自己嘅經歷鼓勵同路人,指鼻咽癌一啲都唔可怕,最緊要係積極治療及面對。期間,陳振華多次拍片記錄抗癌經過,直至10月決定暫停短片,表示想打贏場仗先再拍片畀大家睇,但就指現時身體越嚟越好。日前,陳振華於農曆新年期間拍片大講祝賀說話:「個個都要身體健康,心想事成咁就乜都得,恭喜!恭喜!」從影片中睇到,陳振華身形暴瘦,變咗光頭,同時無埋臉上嘅胡鬚,但睇得出精神狀態唔錯,佢回應網民留言指相信自己一定會好返:「原本86(斤)而家74(斤)(約26磅),我啱啱化療結束,三個月後先知道,因為到時先可以複檢,我一定會好返,狀態好一些的時候,開直播見大家。」
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!