又唔落繩放兔? 兔仔驚到唔郁 主人扯耳抱起 獸醫:扯傷微絲血管或導致耳血腫

·4 分鐘文章

Channel C HK報道】繼早前有人放兔沒有戴胸帶,導致兔仔被狗追四圍亂跑,令一眾兔奴特別關注放兔問題。讀者梁小姐上星期三(13日)就在荃灣街市街附近的德華公園,看見一位女士放兔,又是沒有綁好胸帶,出於擔心於是拍片,豈料竟拍到主人扯兔耳抱起兔仔,令身為兔奴一份子的梁小姐怒火沖天。

報料人梁小姐氣憤地憶述,「德華公園係石屎地又無草,嗰隻兔係好驚,一直無郁過,最後仲見到佢一野抽住兔仔兩隻耳,就咁揈上個身度,兔仔隻耳好多神經線,唔可以咁樣扯佢!」她認為兔仔超級細膽,「我喺屋企打個乞嚏,兔仔都成隻彈起,或者車聲、人聲都係,好嬲囉!」

就事件我們訪問了非牟利機構兔廬,負責人Winky認同梁小姐的憤怒,「今日(13日)都好熱又焗,我哋唔建議帶兔仔出街,同埋主人身上無任何兔袋或籠,都比較危險,最重要係佢就咁扯兔耳係唔ok,兔耳好多神經線,咁做會令佢耳仔受傷。」

扯兔耳或拉傷微絲血管 嚴重導致耳血腫 要做外科手術醫治

究竟「扯兔耳」會對兔仔做成甚麼影響?Channel C邀請了毛國界動物醫院馬醫生提供專業意見。馬醫生指兔仔耳朵比較脆弱,主要由軟骨、皮膚組織、皮下組織和肌肉構造,拉扯兔耳可能會傷及軟骨或肌肉,影響兔耳郁動和進行收音活動。他又指一旦拉傷兔耳的微絲血管,可能會令其出現一種病:「叫做耳血腫,耳朵腫起咗,積咗啲瘀血,最終有機會要透過外科手術去解決呢個問題。」馬醫生指正確抱兔仔的方法,是雙手同時抱起胸口和盆骨位置,切忌只捉兔仔的手或腳,否則兔仔一受驚嚇反抗一踢,可能會拉傷自己的脊椎或腰椎,造成骨折,嚴重可能會導致兔仔癱瘓。

馬醫生:放兔對身心健康好 但要注意三件事

至於放兔被受爭議,有人認為兔仔根本無需放風,但有人就覺得讓牠們跑動較好,馬醫生就指,放兔有三大注意事項,包括天氣、落繩和防蚤。馬醫生解釋兔仔的確需要跑動空間:「兔仔本身喺大自然需要好大空間跑動,佢哋會喺草地走嚟走去,又會掘地道等等,但香港居住環境無咁多地方畀佢玩,所以放兔唔係一件壞事,對兔仔嘅身心健康其實係好嘅。」

馬醫生提醒放兔有很多事要注意,首先是天氣,「香港嘅夏天或春天較熱同潮濕,不利於兔仔散熱,好容易會中暑,呢個一定要注意,通常放兔嘅季節都係秋天或者冬天。」

其次是配戴胸帶,馬醫生指兔仔容易受驚走失,「一定要戴胸帶,我聽過有人喺碼頭邊放兔,好不幸隻兔仔畀其他人或者小動物嚇親,跳咗落海,最終救唔返。」

第三,要提早防蚤,馬醫生指可以揀適合兔仔用的滴頸藥或滴蚤藥,「出去玩之前,提早一、兩星期滴咗先,等藥喺身體發揮藥效,去街玩就無咁容易畀體外寄生蟲依附喺兔仔身體。」馬醫生指兔仔太細膽,濕水沖涼可能會嚇親,做清潔可以選擇乾洗粉或如常梳毛即可。希望各位兔奴都長知識,好好照顧自己的兔主子。

"本文獲Channel C授權轉載。原文連結:https://bit.ly/3vwxkDu"

相關連結:

Channel C原文

Channel C Facebook 專頁

Channel YouTube

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能