又爆夫妻秘密？吳若希形容老公曾經係煙剷 私底下會小鳥依人？

向來多是非嘅吳若希（Jinny）最近因為與家人親子遊被利用照片作宣傳，Jinny要求對方「鏟相」反被Hater追擊，佢一於少理。Jinny最近搞自家youtube頻道，自揭夫妻相處生活日常，又被人話出賣老公。Jinny喺最近接受Yahoo《娛樂訪談》訪問都承認，本來係圈外人嘅老公何兆鴻（Alex）呢期因為拍youtube片而變咗……

Jinny大爆Alex原來好鍾意出鏡，拍片前會剪頭髮，拍完一日又會同朋友呻拍嘢好攰，仲話「終於明白老婆收工咁攰，原來做artist真係好攰」，連Jinny都笑「你心諗自己係artist？」。俾人認為係「霸氣人妻」嘅Jinny之後又展示「御夫術」，先幫老公兜返，Alex拍片後會注重皮膚；點知後來又插一刀「佢以前係『煙剷』」，又喪插老公皮膚差多油脂，最後包尾又話老公貪靚，覺得一切都值得。嗱，呢啲咪識講嘢囉。

外界認為Jinny食住Alex，佢就透露平時會嗲聲嗲氣，反而Alex會唔領情叫Jinny行開。而拍youtube片就可以展示佢地夫妻相處實況，更重要係睇到電視節目以外嘅吳若希。「以前接觸我嘅，（印象）永遠都係『點解嘅』、『好得意』、冇思維同寸寸貢，但係睇完片就知我嘅語氣同思維原來係咁，都幾有趣」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！