【又要捱夜煲劇啦】凌晨時段將重播《美味天王》呢個卡士宜家搵唔到?

《美味天王》
《美味天王》

無綫黃金時段劇集嘅收視一直下滑,但凌晨時段好似未受到影響,仲多次掀起深宵煲劇熱潮,好似早前嘅《義不容情》、《烈火雄心》系列及《絕代商驕》等等。最近重播嘅《律政新人王》及《律政新人王II》由陳鍵鋒、林峯及馬國明等人主演,無論題材及演員都好吸引,令到唔少人都寧願捱眼瞓收睇。《律政新人王II》喺1月7日就會播放大結局,接棒嘅將會係30周年台慶劇《美味天王》。

《美味天王》
《美味天王》

《美味天王》嘅演員陣容非常鼎盛,由「肥姐」沈殿霞帶領一眾演員,包括歐陽震華、關詠荷、古天樂、張可頤、宣萱、林家棟等等主演。當年套劇大獲好評,最高獲得40點收視佳績,即使事隔廿幾年,劇集仍然令人印象深刻。一班鑽石級陣容一齊演出,以美食為主線嘅搞笑電視劇。另外,由一班劇中演員主唱嘅劇集主題曲《Mamma Mia》亦非常經典,當中肥姐嗰句「好好味呀﹗好嘢嚟㗎﹗」至今仍令觀眾印象深刻。

呢個陣容真係冇可能再喺無綫出現,為咗睇一班演員爆笑演出,相信又再有一輪嘅煲劇潮。