受蔣麗芸委託測試蒸口罩 化驗所出聲明澄清

 

早排立法會議員蔣麗芸建議市民,如果唔夠口罩用的話,可以拎個用過嘅口罩去蒸10分鐘殺菌再重用。呢番言論引起嘩然,唔少人講笑話「要唔要加薑蔥蒸」,甚至有網友真係拎去蒸完,發現個口罩會溶咗。而且港大感染及傳染病中心總監何栢良都話呢個idea「害死人」。   事隔幾個禮拜,蔣議員舊事重提拍片講返呢件事,聲稱搵咗香港標準及檢定中心(STC)檢測,證明口罩蒸過之後,平均過濾功能只係下跌0.11%。而且搵到兩岸三地「專家」力撐蒸口罩呢個建議。   今朝,負責檢測嘅STC就喺facebook出聲明指出早前有「一位市民提供了一些口罩樣本委託本中心進行「微粒子過濾效率」(Particulate Filtration Efficiency, PFE) 測試。要求本中心將樣本分成二部分,一部分樣本不做任何處理,而將另一部分樣本放置在攝氏一百度下蒸十分鐘,對兩部分口罩的微粒子過濾效率 (PFE) 進行測試,分別記錄數據。本中心就客人送來之樣本進行以上測試及發出報告。」   STC強調,現時市場上口罩大多數根據美國 ASTM F2100 標準,呢項標準要求評價一次性外科口罩係咪符合規格,需要通過以下測試內容:

  1. 細菌過濾效率測試 (Bacterial Filtration Efficiency (BFE)%);

  2. 微粒子過濾效率測試 (Particulate Filtration Efficiency (PFE)%);

  3. 壓差測試 (Differential Pressure (Delta P) mm H2O/cm²);

  4. 合成血液穿透性測試 (Resistance of Penetration by Synthetic Blood, mmHg);

  5. 可燃性測試 (Flammability test to Class 1.)

而微粒子過濾效率測試 (PFE) 係判斷口罩是否有效過濾微粒子例如塵埃,係眾多安全標準測試的要求當中其中一個內容要求。STC又話嗰次測試報告只涉及提交嘅樣本,而且只係提供測試數據,並無作出任何結論。咦,呢位「市民」應該係蔣議員呀可?STC咁做算唔算係割席呢?

有網友好快就發現,STC主席係唐英年細佬、上海市政協唐慶年。而唐慶年就被證監會指控,佢同一位「關係密切」嘅李奕璇,涉及內幕交易。

亦有網友提出更詳盡測試方法,STC同蔣議員可以考慮下做唔做多轉,一旦證明係work嘅,真係打救世人架!