口罩令撤銷｜口罩含塑膠可回收 環團籲勿棄置全新口罩（附回收途徑）

長達900多日的口罩令終於在3月1日解除，不少家庭及口罩商家尚有大量口罩存貨，恐對堆填區構成沉重壓力。有環團指口罩無法分解，呼籲市民及商家不要棄置全新口罩，可考慮保留備用或捐予有需要人士；環團又促政府主動提供口罩回收點，以免大量口罩垃圾湧堆填區。

「一嚿永遠嘅塑膠垃圾」

綠惜地球總幹事劉祉鋒指，口罩是以塑膠製造，與其他塑膠一樣，在堆填區內無法分解，部份更有獨立包裝，「口罩同個膠袋唔係一啲紙嘅嘢，係膠嚟，要成千年先分解，其實都即係分解唔到，成為一嚿永遠嘅塑膠垃圾」。

他續指，一般口罩有棉繩及鐵線，「如果吹咗落海，對啲魚同海龜就更危險，會阻礙佢哋呼吸，影響海洋生物生存嘅機會」，故即使棄置使用過的口罩，「亦都一定要放入垃圾桶」。

劉預計，部份人仍會繼續選戴口罩，希望口罩商家及市民都不要貿然棄置全新口罩，「呼籲大家千祈唔好扔咗佢，對環境、對自己都係好嘅方向」。對於口罩商家或許面對滯銷處境，「我呼籲佢哋為社會做件好事，與其扔咗佢，不如做個惠及社群、又環保嘅做法，可以送啲口罩去老人院、老人中心，呢啲社區上有需要嘅地方，做個好心，對方都好感激」。

至於一般市民，劉祉鋒指亦可將口罩留待流感高鋒期，或給長者等有需要人士使用，「難保過一段時間又有啲咩事，邊個知？個世界咁多問題」，只要妥善保存，「突然間有咩事就唔使再出去撲」。

劉又呼籲環保署統籌綠在區區等回收點，回收全新、未曾使用的口罩，「政府有無現有塑膠回收場，回收口罩之後拎返啲塑膠出嚟呢？」如果政府有此等安排，社區回收全新口罩便更為簡單快捷。

口罩不織布可提取PP膠

家居回收公司The Loops與從事塑膠升級再造的Gaau1 Up合作，回收全新、乾淨的口罩。The loops創辦人Jorch指，口罩的不織布由PP膠製成，「用技術將啲膠整成好幼嘅線，再織成不織布」，故經過指定工序可提取PP膠，「十幾個夾埋就可以拎到少少PP膠」。市民只需先除去口罩的棉繩及鐵線，便可交至The Loops新蒲崗回收點，費用全免。現有客戶亦可透過家居回收服務作全新口罩回收。不過Jorch亦指，市民不用急於棄置口罩，「總會有啲人繼續戴」，可先考慮轉贈予有需要人士。

講述塑膠回收及減廢的紀錄片《膠樽的煩惱》曾介紹口罩可升級再造成為傢俱。監製黎穎詩指，「口罩都唔係一件垃圾，有佢嘅用途、可以好long lasting，做出嚟啲嘢又好實淨」。她又指口罩令完結導致口罩需求降低，或多或少會影響口罩店的生意，希望大家棄置前考慮清楚，強調口罩要回收「又唔係無方法」。

Gaau1Up聯合創辦人、塑膠升級再造設計師朱煒傑（朱仔）去年十月就利用回收得來的全新口罩，輔以其他塑膠回收品重塑成膠凳，令不少人眼中的「垃圾」再次成為有用的物品。他指當時的口罩是由非牟利社區團體轉贈，由於口罩已經過期而無法派予市民使用，故轉贈Gauu1Up來賦予其「第二生命」。

朱仔指他收到口罩後，會除去棉繩及鐵線，再將口罩放進板材機加熱熔化，便可獲取塑膠重新注模，製作新的塑膠產品如大塊膠板、凳及攀石扣等，「一張凳有3公斤膠，大約有20%係口罩」，不同顏色的口罩亦可用作產品調色之用。

口罩回收詳情

地點：新蒲崗三祝街榮森工業第二大廈9樓903室（The Loops家居回收收集點）

費用：全免

注意事項：先除去口罩的棉繩及鐵線

The Loops家居回收fb專頁：https://www.facebook.com/theLoopRecycle