叱咤半年結︳姜濤有望打入男歌手三甲 MIRROR COLLAR師兄妹內鬨爭組合獎

2022年即將過完一半,以「903專業推介」成績計算嘅商台叱咤樂壇流行榜頒獎典禮,各位歌手同組合喺上半年嘅成績如何?即睇!

男歌手

姜濤
姜濤

以冠軍歌數量計算,上半年有四位男歌手已經各拎2首冠軍歌領導群雄,佢地分別係林家謙、張敬軒,仲有有望首次拎男歌手獎嘅姜濤同埋林海峰(係!2個都未拎過!)。四個人當中,張敬軒嘅冠軍歌On My Way係跨年上榜,計播放次數稍為蝕章。而林海峰多年來最多都係拎「專業推介叱咤十大」,男歌手獎或者會讓路俾年輕人。至於姜濤2首冠軍歌《鏡中鏡》同《作品的說話》上榜時間都夠長,即使下半年主力做返MIRROR成員,只要再多一首冠軍歌都足夠坐銅望銀。至今已經派第4首歌嘅林家謙形勢大好,前年拎銅獎上年拎銀獎,今年應該又再上多一格奪金。

張敬軒 欣宜
張敬軒 欣宜

女歌手

相比之下女歌手戰況十分平均,葉巧琳、謝安琪、鄭欣宜、陳蕾、衛蘭、AGA、方皓玟各有一首冠軍歌。除咗欣宜承接住上年氣勢之外,其餘幾位都有一種可勝不穩嘅況味,但係打算續約嘅AGA應該會得到公司喺下半年加持,但係商台同環球關係麻麻,可能出現變數。而同門嘅陳蕾同衛蘭之中,前者更需要獎項肯定,唱片公司應該會重點支持豹哥。

組合

MIRROR
MIRROR

MIRROR剛剛憑Innerspace贏得冠軍,預計演唱會前後都會派歌,而且有傳MIRROR同ERROR將會參與商台明星籃球賽,咁即係啲歌都會播多幾次喇。去年力壓MIRROR拎組合獎嘅C AllStar暫時未有歌派台,歌曲頗受歡迎嘅Dear Jane亦未有大動作,而上半年攞到冠軍歌嘅組合仲有RubberBand、艾粒同埋今年出道嘅COLLAR。艾粒向來係旨在參與,而「佛系」嘅RB亦未見會密集式出歌,計落今年MIRROR拎金獎機會唔細。同門師妹COLLAR就有望一出道就打入組合獎三甲。

生力軍

承上段,出道歌CALL MY NAME!已經拎到冠軍嘅COLLAR,生力軍金獎應該係8個女仔嘅囊中物。今年唔少新人嘅歌曲都上到三甲,令生力軍競爭形勢更激烈,當中包括張蔓莎、雲浩影(Cloud)、ERROR嘅保錡、黃明德、MIRROR嘅Jeremy(李駿傑)、盧華、「聲夢幫」鍾柔美等等。咦,咁多《全民造星》畢業生嘅?暫時以歌曲質素同埋公司實力計,Cloud、Jeremy同黃明德會係其餘2席嘅熱門。不過而家大部份新人都只係出咗一首歌,下半年先係見真章。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能