叱咤預測︳張敬軒欣宜穩奪男女歌手金獎 銀銅獎爭崩頭 C AllStar力壓MIRROR奪組合金獎

·3 分鐘文章

2021年度叱咤樂壇流行榜頒獎典禮將於一月一日舉行,今年香港樂壇再受注目,賽果自然更有話題性。計算播放率嘅「叱咤樂壇男/女/組合」獎項嘅競爭依然激烈,不過金獎人選大致塵埃落定,銀銅獎反而爭崩頭!(以903專業推介2020年第50周至2021年50周成績推算)

叱咤樂壇男歌手

今年張敬軒喺男歌手歌曲播放率上一枝獨秀,入選「我最喜愛的歌曲」5強嘅《俏郎君》相當有機會打入「專業推介 叱咤十大」,全年5首主打歌分別得到2冠2亞1季軍成績,為「軒公」拿下第5座叱咤金獎。

早前擔任張敬軒演唱會嘉賓嘅林家謙,今年3首派台歌都得到冠軍,最新嘅《在空中的這一秒》雖然升上亞軍但可能已過截數時間,估計難以匹敵軒公,但銀獎應十拿九穩。

銅獎現時至少有3位歌手「叫糊」,分別係上年銀獎得主馮允謙、未拎過男歌手獎嘅Jer柳應廷同林奕匡。馮允謙派台歌較多但只有一首冠軍,林奕匡同Jer各有3首派台歌,當中2首都係冠軍歌,但Jer作品上榜周數較長,估計稍為優勝。

預測︰金獎 - 張敬軒 / 銀獎 - 林家謙 / 銅獎 - Jer柳應廷

張敬軒 欣宜
張敬軒 欣宜

叱咤樂壇女歌手

同男歌手一樣,金獎人選喺上次年中預測已經跑出。鄭欣宜以3首冠軍歌穩操勝券,奪得出道十年來首個叱咤女歌手金獎。

銀銅獎情況膠著,派台歌多於3首而又拎過冠軍嘅女歌手至少6位︰陳凱詠、林欣彤、黃妍、謝安琪、AGA及泳兒。佢地嘅歌曲成績如下︰

陳凱詠(4首)︰冠軍x1

林欣彤(5首)︰冠軍x1、亞軍x1

黃妍(5首):冠軍x1、亞軍x1

謝安琪(3首):冠軍x1、季軍x1

AGA(3首):冠軍x2、亞軍x1

泳兒(3首):冠軍x1、亞軍x1

如果以去年第50周起計算成績,AGA即使有2首冠軍歌,但上年推出嘅So Called Love Song只係計到1個禮拜播放率,6人當中暫時機會最微。早前「連登」有人貼文話泳兒拎銀獎,計計數今年佢有一冠一亞,但因為《所有遺失的東西》跨年上榜,數字上稍為輸蝕,而同樣情況亦發生喺謝安琪之上。其餘三位之中陳凱詠同黃妍比較突出,亦配合商台支持新生代嘅風格,但要視乎內部數字、截數日期同埋「得獎效果」等因素,變數極大。

預測︰金獎 - 鄭欣宜 / 銀獎 - 陳凱詠 / 銅獎 - 黃妍

叱咤樂壇組合

呢個項目比較易估,休團4年嘅C AllStar全年派歌5首,共有2首冠軍歌。雖然MIRROR今年人氣大盛,WARRIOR更加係少數冧莊2周冠軍歌,但由於全年上榜歌只有3首,數字上難以超越C AllStar。Dear Jane 及RubberBand有望拎銅獎,但RubberBand的《每道微小》跨年上榜影響播放數字,有3首上榜歌嘅Dear Jane比較著數。

預測︰金獎 - C AllStar/ 銀獎 - MIRROR / 銅獎 - Dear Jane

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能