【叱咤2020】AGA穩奪女歌手金獎 許廷鏗爭金有隱憂

將於元旦舉行的《2020年度叱咤樂壇流行榜頒獎禮》，由於獎項結果按歌曲喺商台嘅播放率計算，今年不少一線歌手如陳奕迅同容祖兒都喺年尾派歌，難以「儲夠」播放率爭奪男女歌手獎，預計一眾2010年後出道嘅歌手，有望喺今年頒獎禮上「開齋」！

女歌手金獎形勢比較明朗，上年銅獎得主AGA今年有3首冠軍歌（See You Next Time、So Called Love Song、MAD）冠絕同儕，有望首度奪金。

至於女歌手銀及銅獎競爭形勢相當混亂，上屆銀獎得主鄧小巧今年未有冠軍歌，好大可能三甲不入。至於曾經奪得金獎嘅衛蘭同謝安琪，今年各有一首冠軍歌，謝安琪雖有2首亞軍作品，但與Juno合唱嘅《合唱歌》成績只計一半，比較輸蝕。

其餘有力爭入三甲嘅女歌手當中，Gin Lee及黃妍都係有3首派台歌取得1冠1亞，但黃妍嘅《我心中尚未崩壞的部分》最高去到第4位。陳蕾今年有4首派台歌，得過一次冠軍，但最新嘅《旁觀有罪》究竟會唔會計入今年成績仍屬未知數。預計Gin Lee、黃妍、衛蘭及陳蕾會係熱門人選，視乎Gin Lee同AGA（同屬環球）及衛蘭與陳蕾（同屬華納）嘅唱片公司會點樣同商台商量！

男歌手金獎估計由《超級巨聲》出身嘅許廷鏗同馮允謙爭奪。馮允謙今年4首派台歌當中有3首成為冠軍歌，許廷鏗雖然只有2首歌奪冠（《無力感》、Negative)，但係合共有5首上榜歌，《慌》更加成為亞軍，總播放次數可能稍勝一籌。

男歌手銅獎亦係2揀1嘅局面，林奕匡有2首冠軍歌，但《黑方格》係跨年上榜，部份播放率未能計入今年。而去年出道嘅林家謙，今年有4首上榜歌，冠軍歌《一人之境》以外嘅3首作品分別最高去過一次亞軍兩次季軍，而《時光倒流一句話》亦係跨年上榜，同林奕匡情況相似，但稍為領先。