叱咤2024 預測︳Anson Lo盧瀚霆同林家謙爭男歌手銅獎 MIRROR再次失落組合獎？

2024年度叱咤樂壇流行榜頒獎典禮將於1月1日舉行，計算歌曲播放率嘅獎項亦即將步入截數日子。唔少網民都會聽實節目計算商台歌曲全年播放次數，而綜合網民數據及903專業推介上榜歌資料，各大獎項賽果都漸見眉目。

叱咤樂壇男歌手獎方面，競爭相對激烈嘅會係銅獎。暫時有望爭獎嘅有陳健安、盧瀚霆Anson Lo以及過去2年奪得男歌手金獎嘅林家謙。陳健安本來係早前「商台女員工」流出名單嘅男歌手銅獎得主，不過On仔嘅《愛的一種練習》係跨年上榜，播放率數字打咗折扣。而Anson Lo今年成績不俗，4首派台歌取得兩冠一亞，而正在榜上嘅《致我》都有一定播放量。至於林家謙雖然歌曲上榜名次不及盧瀚霆，但網民統計數字上家謙已經超越Anson Lo，而林家謙主唱嘅《破．地獄》主題曲《普渡眾生》更將於本周六公布嘅903專業推介成為冠軍歌。有網民認為林家謙與盧瀚霆可能會各得男歌手銅獎及叱咤十大，最後結果可能要睇商台取態。而男歌手金獎及銀獎，好大機會由已經拋離其他對手嘅馮允謙同陳卓賢奪得。

女歌手獎同樣係銅獎最有懸念，雲浩影一度被視為三甲人選，但下半年3首派台歌未能奪冠，令形勢出現逆轉。網民分析Cloud嘅《回憶半分鐘》有望打入叱咤十大，可能削弱爭奪女歌手獎優勢，而去年金獎嘅陳蕾有望靠年尾發力保住銅獎。去年女歌手銀獎嘅Gin Lee今年終於坐正首度奪金，而商台一路支持嘅JACE陳凱詠就估計會獲得女歌手銀獎。

組合獎方面，大熱嘅MIRROR今年2首團歌獲得一冠一季，算係有所交代，但因歌曲數量少影響播放數字，難以爭獎。而今年由組合奪得903專業推介冠軍歌嘅作品只有4首，因此派歌量成為爭獎關鍵。蟬聯組合金獎多年嘅Dear Jane將繼續雄霸，而COLLAR就力壓同門MIRROR獲得銀獎。銅獎將會由謝芊彤、謝芊蕾嘅雷同二友，以及樂隊The Hertz爭奪。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！