5大叻沙推薦！鮮甜龍蝦喇沙、娘惹風濃湯口味

講到東南亞菜式，叻沙都係其中一種最有代表性嘅菜式～叻沙香濃又惹味，唔少香港人都係fans呀，不過各有流派，每個地區都有自己特色，有椰香味濃同偏酸辣等派別，今期推介其中5間值得一試嘅叻沙店！

鰂魚涌喇沙小店 迷湯肉骨茶專門店 

店舖細細，只有約8個座位，而且只係開平日午市，想食嘅要搵啱時間去呀。餐廳主打叻沙同肉骨茶，叻沙有兩款，貴啲嗰款湯底當然豪華啲。湯頭呈啡黃色，仲有唔少紅油，顏色上已經令人好開胃，味道順喉不膩，唔係太稠身嗰種風格，蝦香同椰奶味都突出。配料上都好正宗，有螄蚶、虎蝦、豆卜、雞蛋、芽菜同魚片，螄蚶鮮甜冇腥味，蝦肉彈牙同有蝦膏，麵條掛湯。

娘惹風濃湯叻沙 Rempah Noodles

走時尚路線嘅新加坡菜，主打娘惹地區嘅菜式。娘惹濃厚叻沙淨係湯底都好花心思，自己炒香料膽，材料有乾葱、南薑、黃薑、香芽、石栗等7至8種香料，再加上雞骨同豬骨熬成嘅湯底及椰漿。叻沙比一般杰身，味道好香濃。配上米線、豆腐卜、魚片、雞蛋同蝦肉，味道偏甜帶微辣，啱晒重口味嘅朋友。

湯頭濃稠 麵佬到

呢間同樣賣湯底濃稠，但就係馬來西亞風格嘅叻沙。湯底以八角、肉桂等十多款香料熬成，好濃厚，集咖喱香、椰香同蝦香。另外亦加上參巴醬，為湯頭帶來另一份鹹香，加埋甜甜地嘅炸蔥頭又再多多種層次～配料都好豐富，大海蝦、魚片、炸魚蛋、白魚蛋、豆卜同雞蛋等，特別推介魚蛋，好有魚味。

大大隻龍蝦叻沙 蘇山雞飯

係豪華版嘅叻沙呀，皆因佢嘅配料有龍蝦！湯底都幾濃味，而且蝦嘅味道好突出，會令人一啖又一啖咁飲落去。配料方面有半隻大龍蝦同啖啖肉蟹鉗，彈牙又鮮甜，另外仲有魚蛋、魚片及雞蛋等，食完真係捧住個肚走！

酒吧秘製叻沙 Brick by Brick

酒吧都有叻沙食？冇睇錯呀，呢間酒吧同時主打馬來西亞菜，招牌秘製馬來西亞咖喱喇沙湯麵係招牌菜～可以跟一款配料，如果鍾意海鮮嘅，推介揀珍寶大蜆拼大蝦，個湯底係全靠蔬菜同香料熬製而成，冇落糖同味精，椰奶比例係專登少一啲，仲要落埋啲蜆同海蝦一齊煮成呢碗喇沙湯，鮮甜美味。

餐飲券：8折 秘製馬拉咖喱喇沙麵 濃郁醒胃 !午餐首選 !(只限外賣自取)

文: Yanica