同《魷魚遊戲》李政宰撞樣 譚俊彥拍過六十幾部作品 入TVB先有人識

·2 分鐘文章

今年娛圈人氣急升之選,除咗個個都識嘅MIRROR之外,仲有譚俊彥(Shaun)。

客觀分析︰如果有睇TVB,今年Shaun嘅「能見度」的確高咗︰《失憶24小時》再加成為台慶劇嘅《換命真相》,後者收視仲要跑贏卡士勁嘅《星空下的仁醫》,客串嘅《拳王》又係台慶劇,最爆嘅係同全球大熱《魷魚遊戲》男主角李政宰竟然撞樣,咪就係行運囉。

不過Shaun接受YAHOO TV《娛樂訪談》講起,自己拍咗超過60套影視作品,到第一套主演嘅TVB劇《天命》出街先有人識。行運?倒不如話係分期拎返累積獎金。

譚俊彥自己評2021年係有啲運仔,因為《天命》撞正世界盃,前年嘅《包青天再起風雲》遇著社會運動,有對比之下今年的確好彩,但係Shaun都明白噱頭唔持久,自己又唔係有天份嘅演員,唯有勤力。

咁佢又點睇似李政宰呢單嘢?「老婆話好似」,咁即係似啦,甚至幾年前身邊朋友都話佢似。譚俊彥叫李政宰做「李生」係出於尊重,因為唔想對方認為抽佢水嗰個原來冇料到。

《魷魚遊戲》參加者為咗錢而搏老命,譚俊彥都想似最後贏家拎到獎金,畢竟20歲入行至今,去過台灣發展再去新加坡準備出碟,冇成績唯有晚晚飲酒;之後北上拍戲拍劇,為仔女返香港。好在唔係《魷魚遊戲》咁一輸就命都冇,有得第三次由頭開始,反而似《換命真相》。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能