同姚子羚忘情激咀 林嘉華被老婆𥄫到實

林嘉華近日在電視劇《燦爛的外母》中做花𡃁角色，仲有個索爆女友姚子羚，同36歲子羚早前的一場深情咀戲，未出街已成為網上熱話！長居加拿大的林嘉華最近回港三個月，老婆劉寶珍做跟得夫人陪夫回港宣傳𥄫到實，剛滿60歲的林嘉華雖然已經係花甲之年，但無論身型與樣貌都完全唔似，太太睇緊啲絕對可以理解！

林嘉華咀姚子羚 網民唔like

入行40年的林嘉華演過無數角色，近年都係香港加拿大兩邊飛。近日由港視重返TVB，由之前喺港視《警界缐》走開的型佬路線，忽然轉演輕鬆喜劇，更演口花花的花𡃁角色，仲同年輕24年的姚子羚演情侶兼拍咀戲，令網民好妒忌，更以「美女與野獸」來形容！但華哥就覺得，觀眾應該睇劇情同角色，唔應該計算演員的年齡！

林嘉華唔介懷網民對咀戲反感，更代太太否認為此呻醋，林嘉華話：「太太會追我演嘅劇集，佢唔止作為觀眾咁畀意見，又會企喺我嘅角度去睇，意見仲好中肯！」

廣告

林嘉華：太太100%信任自己！

雖然林嘉華代太太發言話唔介意，但查實今次華嫂跟實林嘉華返港做宣傳，不但陪出席活動、做訪問，開工收工都行孖咇，實行人釘人跟到實。早前，華哥出席完活動後，就趕去中環會合太太與朋友飯局。飯後華哥接受本刊記者訪問時，被問到太太會唔會介意佢同姚子羚嘅咀戲，佢就話絕對冇，太太係自己最忠實嘅觀眾，仲話自己識得抽離，強調太太100%信任自己！

林嘉華為興趣拍劇

現年60歲嘅林嘉華84年同從事服裝指導的劉寶珍結婚，一轉眼33年，兒子林政峰亦已經29歲，以往嘉華哥返港拍劇，太太都留在加國，不過今次就做跟得夫人！嘉華哥又坦言自己熱愛演藝工作，金錢都係其次，希望將來繼續有多啲好劇本俾佢演出啦！

全文完