否認連累老婆 陳自瑤孭飛劇煞停 王浩信：有同佢講加油

有指王浩信主演的劇集收視偏低，連累老婆陳自瑤首次做女一的劇集被迫煞停！他認為兩者沒有關係，有信心劇集大結局會收視反彈，並已叫太太加油。

王浩信、袁偉豪、黎諾懿、黃智雯、王敏奕、陳煒與戴祖儀等，昨日在將軍澳電視城宣傳無綫劇集《刑偵日記》，眾人趁奧運熱打乒乓球切磋球技。劇集雖然有口碑，但收視離奇偏低，上周7天跨平台總收視更只得11.4。對於劇集下周大結局，問王浩信可有信心收視反彈？他說：「有信心反彈，希望有廿幾點，有廿幾點已經好叻，因為好多觀眾都睇咗，收視未必反映到劇集嘅質素，對收視亦冇失望，內地嘅回響亦反映對港劇加分。」

黎諾懿拒講胎兒性別

有指《刑》劇收視欠佳，連累陳自瑤處女擔正的《選美的12夜》煞停，要高層重新審視劇本，他說：「唔關事，呢啲等公司處理。（有冇安慰吓太太？）都有同佢講加油，佢工作嘅努力，公司會睇到。（首次做女一就咁？）做演員就係咁被動！」而王敏奕預告於結局篇有前所未有的崩潰喊戲，必定我見猶憐。

而黎諾懿最近宣布太太再懷孕，問到老婆是否如願佗B女？他說：「都係大家估啫，今胎留番畀老婆開估，無論係仔定女都會『封肚』。（BB性別有冇話畀朋友知？）鄭伊健、蒙嘉慧佢哋都知，相信佢哋唔會講。」

《愛．回家》繼續高收視

無綫亦有公布其他節目收視，《愛．回家之開心速遞》繼續坐擁高收視，達22.8；上周二及周三分別播出的《聲夢傳奇決賽》及《聲夢傳奇傳奇誕生》收視亦不俗，達23.9及17.1。