吳奇隆後又一苦主 47歲鍾漢良上內地綜藝滲出大叔味

內地綜藝《超有趣滑雪大會》食住北京冬奧話題推出，上次搵51歲台灣男星吳奇隆做嘉賓，向來被認為保養得幾好嘅「柿隆」，喺節目出街後被指凍齡不再，網友更加笑佢面容浮腫，頸都唔見埋。最近節目請到港星鍾漢良現身，點知都係出事。

47歲嘅鍾漢良參與《超有趣滑雪大會》剛剛播出，本來keep得唔錯嘅佢，拍埋一班年青主持當堂有長輩感，部份鏡頭更加影到佢面目全非。

有網友估計鍾漢良「打針變靚」重手咗，亦有心水清網友認為，節目上次搵吳奇隆做嘉賓都有咁嘅情況，一係後製出事，又或者想炒作話題爭收視。

90年代加入TVB做舞蹈藝員嘅鍾漢良，一度轉到戲劇組拍劇，曾經備受睇好。不過當時鍾漢良同TVB合約到期，大台要求簽長約綁人，鍾漢良拒絕因此被雪藏。而喺台灣發展嘅香港歌手邰正宵，睇完鍾漢良有份主演嘅《少年五虎》，認為同劇演員朱健鈞有發展潛力，於是搵中間人約見，點知溝通有誤，同邰正宵見面嘅係鍾漢良。鍾漢良決定過台灣發展答應，1995年夏天喺當地推出國語專輯一炮而紅，多年來主攻兩岸市場，人氣保持得唔錯，上年主演嘅內地網劇《錦心似玉》仲有強勁點擊量。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！