吳孟達病逝 杜德偉、苑瓊丹等好友出席無綫悼念節目分享合作點滴

·17 分鐘文章
吳孟達病逝 好友出席無綫悼念節目分享合作點滴
吳孟達病逝 好友出席無綫悼念節目分享合作點滴

資深藝人吳孟達(達哥)前日(27日)不敵肝癌病逝,終年70歲。達哥喺1973年投考無綫第三期藝員訓練班而入行,縱橫影視圈接近50年,拍過無數經典劇集及電影,陪伴幾代香港人成長。無綫喺噚晚(28日)為達哥舉行直播1小時特輯《無可比擬的演藝泰斗 永遠懷念 吳孟達》,並邀請多位達哥圈中好友上節目,例如羅冠蘭、鄧英敏、麥鎮江、伍潤泉、吳麗珠、關禮傑、苑瓊丹、田啟文及林子聰等等,分享與達哥嘅合作點滴。

羅冠蘭被問到佢係唔係覺得當時達哥特別有演戲天份,佢就話:「達哥直情係一位演藝泰斗,但我覺得最珍貴嘅地方就係我覺得佢好誠懇對於表現嗰種理念係好令人感動,同埋我覺得佢將豐富嘅人生歷練轉化成一種修為,所以你同佢傾計你發覺佢係散發緊一種好祥和、好美麗嘅一種境界,所以真係特別懷念佢。」

鄧英敏被問到點解會有「七君子」呢個名同埋達哥嘅強項喺邊度,佢就話「我哋73年讀74年畢業,跟住經過十年八載,有啲嫁得嘅就嫁,有啲留低嘅留喺度,有啲part time嘅唔算數,full time嘅當年淨返七個男同學「發、達、東、泉、敏、鵬、鏗」。另外,達哥嘅強項就變化萬端,因為我同佢拍《旅遊孖寶》嘅時候,take 1同take2講嗰句嘢又唔同,take3又唔同,不過好彩我做下靶。」之後,鄧英敏再問到EYT當時好興爆肚,有冇達哥經典嘢可以分享下,佢就話:「有!逢係做EYT嗰啲周不時都排就一套,到演出又另外一套。排嘅時候正正經經冇嘢嘅,一去到咁上下就可能扯開件衫,心口就黐晒啲毛,或者呢度又寫啲字。總而言之十八般武藝,十八般道具,見到道具有乜就攞乜。」

伍潤泉:「其實達哥喺訓練班嗰時已經喺社會做過嘢,所以俾我哋成熟好多,因為我哋都係啱啱讀完書出嚟。我都講下佢啲曳嘢,因為佢有次突然間喺訓練班上完堂之後,佢就話不如我哋去探險囉~去邊度探險呢?然後就入咗九龍城寨。我真係第一次落去九龍城寨,然後就見識得更多嘅嘢。」

余家倫:「我訓練班就唔係同達哥同期,咁好似佢(伍潤泉)講,達哥係嗰個時期已經俾我哋成班花𡃁仔成熟,佢已經出嚟社會做咗嘢,可能已經1、2年咁樣,所以我同佢喺訓練班嘅交往比較上少一啲。我哋只係做assignment嘅時候,佢做嘅話我就盡量搵佢啲錯處嚟彈,無辦法架啦,我唔知係咪心理上覺得,佢好似我做親嗰啲,佢又零舍彈得多啲㗎喎,零舍努力啲彈。我見佢彈得我多,咁我咪又搵多啲嘢彈返佢,咁可能喺呢個過程裡面,唔知係咪咁樣佢感染咗我,喺嗰個時期做assignment嘅時候,我會好努力去排,好努力去做,因為就係一個「假想敵」喺度,喺訓練班佢係我嘅「假想敵」。」

吳麗珠:「嗰陣時達哥就係第三期訓練班,我係第九期訓練班。咁我就好遲入《歡樂今宵》,我做歡樂小姐先,然後升做藝員嘅。當時我都會戰戰兢兢同好驚,咁達哥就會教你,譬如話有時有啲怪招,如果我哋做得唔夠放,佢就會教你點樣做,同你會對下稿。因為我哋有時唔敢問前輩對稿,咁佢會主動同你對稿,又唔會蝦你。不過記憶最深嘅反而《歡樂今宵》木人巷,我諗大家都知架啦,就係猜枚啦!當時佢哋好鍾意猜枚,嗰時我係細路女唔識,咁佢會教我,因為當時好斯文,達哥就話唔得㗎,猜枚要有氣勢,即係教我哋呢啲咁樣囉。」

麥鎮江被問到訓練嘅難忘事時,佢就話:「嗰時達哥坐喺我隔離,當時我哋訓練班嘅排位係用英文姓嚟排位,我姓麥Mak咁就M,達哥就吳即係N。我記得就係佢上堂之前都唔知走咗去邊,成日走嚟走去,但係導師一嚟嘅時候,佢即刻就好齊整咁坐咗喺度。平時郁來郁去,(導師)喺度就好齊整,佢真係好用心,佢全部有要求,所以難怪佢喺演藝界有咁嘅成績。」

關禮傑與達哥曾喺《新紮師兄》合作,被問到有冇邊一場戲係特別難忘,佢就話:「有一場戲就講我啱啱喺cadet school完咗,但係我做唔到警察,因為我要返屋企做生意。咁嗰場戲佢就送我離開cadet school,係我第一次喺螢幕裡面學識流眼淚,俾佢感動到即係戲嘅氣場。嗰場戲其實係幫咗我,同埋覺得喺呢套戲入面昇華咗,嗰場戲我自己好感動,我自己好鍾意。」

戴志偉被問到喺《新紮師兄》同達哥多唔多對手戲,佢就話:「對手戲有,但唔係太多,因為嗰時我係一個督察,佢係我下屬。同達哥合作有一個好特別嘅地方,我留意到佢有孖寶,佢嘅孖寶就係煙仔同埋劇本,見親佢就係呢兩樣嘢,冇其他㗎啦!雖然我哋冇對手戲,但係我鍾意睇佢排戲,因為佢鬧班cadet仔好過癮,我成日走去隔離廠睇,我學佢嗰啲輕重位,佢講嘢嗰個台詞好得意,佢鬧人嗰下一句說話有幾個輕重位,係好有樂趣同埋學到嘢。」至於私底下佢同達哥熟唔熟,佢就話:「其實私底下唔係太熟,有時喺canteen傾計,因為佢係早我哋係後,我係第十期,嗰時我入到去我當佢師兄,見到佢都肅然起敬,唔敢同佢講太多心底話,總之如果同佢有戲唔可以衰,一定要做得好。」

劉家豪(拍片):「好記得達哥成日同啲新人講演出係有兩個重點,一就係同拍檔嘅默契,二就係演出時嘅節奏。達哥同周星馳喺《蓋世豪俠》嗰度建立佢哋嘅默契,之後喺《他來自江湖》佢哋演出嘅節奏簡直係大放光芒。達哥同星仔喺房後面,一個扮萬梓良,一個就扮張鳳妮,佢兩個嗰種節奏真係唔容易做得到。《他來自江湖》佢兩仔爺嘅經典場面當年為人津津樂道,要欣賞達哥同周星馳嘅默契同埋節奏,大家可以喺聽晚(即今晚)翡翠台重溫《他來自江湖》。」

杜德偉:「我係喺04年嘅時候同達哥喺內地合作咗一套《邊城小子》,喺戲裏面我同達哥演一個好接近嘅關係,即係類似達哥同周星馳嘅合作關係。我覺得非常之榮幸同埋當時覺得非常之威水。我記得達哥好得意,第一日同佢開工就問佢有冇帶啲三級片嚟,咁我話吓?三級片做咩呀?達哥就話無呀,我覺得要建立一個最好嘅關係就係兩個麻甩佬一齊睇三級片,咁就進展得好快架喇!咁我咪亂咁講話有呀,咁達哥話我陣間入你房同你一齊睇戲。隔一陣間佢就敲門,攞咗一本書入嚟,佢就同我講話呢本書我同任何一個同我合作關係好接近嘅朋友,我都會送一本畀佢,就係叫做《角色的誕生》,因為佢話呢一本書能夠令到佢將之前演戲,佢話佢之前演戲係一個「霸」嘅身份,好勁㗎啲戲,一定要殺到大家一頸血。睇完呢本書之後,佢自己諗咗好耐,佢覺得應該係要做一個「王者」唔係做一個「霸者」,正所謂「以力服人者為霸,以德服人者為王」,咁佢就做咗一個戲王,之後就係一個更加成熟嘅吳孟達。」

黃一山(拍片):「達哥俾我嘅印象就好似佢成名作1979年嘅《楚留香》裡面胡鐵花呢個角色,胡鐵花係個點嘅人呢?好似達哥咁疏財仗義、豪爽大方。同達哥一齊食飯,達哥永遠係爭住買單嗰個,就算有啲係一線明星、大牌明星,或者係有錢老闆一齊嘅話,好多時都係佢爭住埋單。我都會同達哥講嗰啲人大把錢,你做咩要爭住埋單,達哥就話無所謂呢啲濕濕碎,相對佢嘅片酬呢啲係好小嘅意思,錢係搵嚟使㗎嘛。我同達哥第一套合作嘅戲就係《逃學威龍》,我記得喺片場裡面佢經常同星爺匿埋一邊細聲講大聲笑,喺度研究笑話,講講下有時星爺都忍唔住問達哥呢個笑話得唔得架?達哥就會話觀眾應該會畀面掛?意思係話觀眾見到佢哋做呢,係冇問題嘅,會笑嘅,唔會覺得誇張嘅。」

王晶:「1975年喺《歡樂今宵》已經同佢合作,喺電影就90年拍《賭俠》重新合作,我哋拍咗十幾部。佢係一個最好嘅下靶演員,即係任何小生,無論你做戲點叻,你遇著佢就加分,佢可以令到所有小生加分,呢個係佢好勁嘅一樣嘢。佢肯做一個100%嘅下靶,去托到你好睇為止,然後佢自己都好睇架喎,嗰度先難得喎。」另外,佢仲話:「我覺得佢演繹海大富,畀原著更加豐富,後來張衛健演電視劇,我都搵返佢嚟做同一個角色,佢又有啲新嘢出嚟,好犀利呀!」

苑瓊丹:「我記得我同達哥拍過一部電視劇,嗰場戲就講佢拋妻棄子,後來我啲仔大,佢就想返嚟,我就同佢鬧交。當時嗰場戲係佢追住我走出嚟,導演就話難得你兩個喜劇演員都喺度,場戲不如搞啲嘢,你兩個踎低講對白呀!咁當時我就著咗話「唔係呀嘛導演」達哥即刻㩒住我話「苑仔做一次畀導演睇,我哋踎低一齊做」。咁我哋做完之後,達哥就問「導演咁呢個情況底下係咪有啲路人會經過」,導演話冇。達哥話咁就冇反差,咁踎喺度好似冇意思喎,導演話你哋照返正常。之後我哋繼續排,導演又話諗到條新橋,你兩個「之」字咁行路啦,達哥話試一次畀導演睇,「之」字咁行啦我哋。之後達哥就問導演你覺唔覺得我同苑仔冇乜交流,導演就話咁照返你哋方法啦!突然間導演又話苑仔你鬧佢你個負心漢,達哥就要做動作。之後,達哥就唔出聲靜咗落嚟,咁我就睇下達哥想點,達哥隔離有棵樹,佢就拎轉身話阿樹你覺得咁樣有冇問題呀?跟住佢擰返轉頭同導演講棵樹話唔係幾好喎。喺過程入面我感受有幾樣嘢嘅,第一件事達哥係唔會唔尊重你所有意見。佢話你做啦苑仔,你覺得100個唔合理都做,做完先講,咁我咪做囉,做完慢慢同導演商量,商量完之後佢最後冇符。佢寧願用一個嬉笑怒罵、四兩撥千金嘅手法。去到今日我自己有時諗返轉頭,點解我哋學唔到,達哥喺呢個行頭都好高地位,佢都係用呢個方法,我覺得呢件事好值得後一輩演員借鏡。」

馬海倫:「《鹿鼎記》係晶哥做導演,我就係做獨臂神尼。我打完之後佢就埋嚟同我講helen姐你都仲幾揪得下喎。原來我係不停打,跟住我就接《碧血劍》就做佢老婆都係打,喺嗰部戲我同佢對手戲就多啲。除咗拍戲之外,佢仲周圍帶我去食嘢,去到每一個餐廳,每一個人都對佢好好,佢真係好慷慨,全部係佢請晒。」

黃百鳴(拍片):「我同達哥嘅合作就係1993年《花田囍事》,成套片都係喺新加坡拍攝,拍得好順利好開心。達哥係一個非常優秀嘅喜劇演員,同埋呢度戲成為1993年上映賀歲片嘅票房冠軍,佢嘅離開係好令人懷念。」

田啟文:「因為我噚日(27日)係喺醫院睇住佢走,所以就對我影響比較大。我到呢一刻都仲未接受到佢離開。佢係走得舒服,醫生話俾我哋聽佢喺瞓住,聽到晒我哋講嘅嘢,但係就佢比唔到反應。到佢走嗰一刻,因為佢一直瞇埋眼喺度抖氣同呼吸,到佢走嗰一刻佢係擘大對眼,俾咗一個反應跟住就走。我之前係想安排早啲去睇佢,但係嗰時我唔想要咁多媒體走去阻擾佢休息同治療,所以我一路都冇去。我噚日我覺得我係自責嘅,即係佢喺度講佢啲嘢嘅時候,我點解唔喺佢身邊同佢再傾多啲計,而喺佢冇反應嘅時候我先出現...佢話俾我哋聽佢做咗兩次化療,做咗之後會有一啲轉機,希望可以喺嗰刻再去,所以只可以遺憾,好多人走我都唔可以喺身邊。」

黃一飛(拍片):「我黃一飛聽到吳孟達嘅死訊覺得好突然,因為我唔清楚佢原本有咩病。我大佢9歲,我而家戴帽都拍㗎,白頭人送黑頭人,我就送唔到,希望佢家屬節哀順變,人總會有一日一縷青煙,唔好咁傷心。」

林子聰:「我之前搵緊佢嘅時候,就係傾緊我嚟緊有套戲想搵佢做一個角色,但係你知道達哥鐘意做戲,佢已經排咗3套戲,即係如果要排都要排到5月份。咁我話達哥都要睇住身體,因為都唔使咁操勞。之後佢話係咁架啦,我鍾意拍,你記得諗嗰啲嘢唔好係我做過㗎喎,要我未做過嗰啲,我先接㗎!即係佢到而家都仲有嗰團火喺度。」

甄懋強:「達哥雖然離我哋而去,但係佢嘅演藝精神永遠喺我哋心中,我哋訓練班嘅所有同學都以佢為榮。」

曾志偉:「我今日上嚟想同大家分享一個達哥嘅故事,呢個喺我人生入面,係我不停同啲後生或者一啲演藝界嘅朋友去分享,係一個好有正能量嘅達哥親身故仔。達哥喺我哋TVB係一個演藝非常之精堪嘅演員,但係其實喺佢年輕時間,由於佢咁叻,佢自己生活比較放任,係鍾意飲酒賭錢,仲賭到周身債,成日周圍問啲同事借錢,甚至乎棚入面嘅職員都借,借到大家唔敢叫佢開工,就係覺得叫佢開工咪又要借錢俾佢。但佢身邊有一個好朋友,而家好出色嘅演員,大家有時晨運都會見到佢,係不斷資助佢同幫佢。但有一日佢都同達哥講我唔能夠再幫你,咁樣會害咗你,由嗰日開始達哥覺得人生冇希望,因為一個咁好嘅朋友都唔決定唔幫我,其實我已經知道喺我人生嘅盡頭。嗰陣佢諗過不如算喇,去到城門水塘想檻隻腳落去。佢望住個天就話,希望下一世能夠再做人,可以重新做人,要做一個更好嘅演員。但佢又諗我可能未必得,下一世可能做牛做馬做狗,未必一定做人,但我而家仲係人,我點解唔可以而家從新做人呢?諗完嗰句之後佢,佢返咗屋企,瞓咗一日一夜決定重新做人。然後佢返去TVB,同所有編劇同導演講,你用返我喇,你會見到一個唔一樣嘅吳孟達,由嗰日開始達哥係TVB大家所知道佢從來唔使帶劇本,所有對白都由頭記到尾,甚至幫人哋嘅都記埋。我未見過佢帶劇本入廠,呢種演員道德真係非常難得。我就係想同大家分享人生就係咁,你會有好唔如意嘅時間,但係如果有機會再重新嘅話,其實你可以變咗另一個人,達哥就係好例子。達哥就係可以由一個大家見到會驚,變為萬人景仰。」

另外,無綫亦安排喺今晚11點55分第三線劇集時段改播《永遠懷念 吳孟達:他來自江湖》。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能