吳業坤周奕瑋採訪東奧 網民質疑用奧運採訪簽證拍旅遊節目

2020東京奧運無綫派出5位奧運主持到當地進行採訪，繼陳約臨「花癡式」訪問張家朗被轟後，吳業坤（坤哥）及周奕瑋（Jarvis）喺採訪港隊划艇選手洪詠甄亦被網民狠批唔尊重運動員，其後二人喺IG出PO道歉。東奧經已曲終人散，不過近日就有網民發現TVB將於9月／10月播出一個名為《#好掛住日本》 嘅新旅遊節目，而節目主持正正就係吳業坤（坤哥）及周奕瑋（Jarvis），所以唔少網民都質疑佢哋以「奧運採訪簽證」名義訪日，但同時又去拍攝旅遊節目嘅做法合唔合理。

好多人都知道周奕瑋係日本通，曾主持《周遊東京》憑貼地推介及流利日文，深得觀眾喜愛及追捧。早前喺奧運期間佢喺影音平台上載日本Vlog-「東京五輪番外篇･挑戰15分鐘來回便利店掃貨」，唔少網民都大讚好睇同埋話好鍾意佢拍嘅影片，睇到令人再三回味！

由坤哥及Jarvis主持嘅《#好掛住日本》，主要係令大家了解日本人於疫情下目前最新之生活情況及介紹唔同嘅吃喝玩樂，務求為大家可以止一止旅行癮。平時香港人去日本等於「返鄉下」，喺疫情下咁耐冇去，有新旅遊節目睇下當地嘅最新情況應該係好開心，不過就有網民質疑兩位主持係唔係濫用今次「奧運採訪簽證」去拍旅遊節目，皆因日本當局對各國傳媒嘅限制非常多，例如定期接受檢測、入境後首14天不可訪問觀看比賽嘅觀眾或進行街訪等等。

唔少網民都抱有懷疑態度紛紛留言討論，例如「有冇違反簽證條件？」、「好似真係唔得」、「用奧運記者身份入境、隔離然後拍自己節目」、「日本政府都叫啲人無野唔好周圍走同去第二個縣, 你仲學人玩旅遊節目, 醜唔醜」、「簽證咁用既咩，拎咩簽做乜野常識啦嘩」及「海外媒體好似得頭14日有限制唔俾外出唔俾坐公共交通，過咗就好似冇人理 btw而家好多縣仲係緊急狀態佢地咁樣周圍去周圍玩」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！