吳業坤放「疫監」吔四寶丸洗塵

吳業坤收到四寶丸即食,個樣感動到呢!
吳業坤收到四寶丸即食,個樣感動到呢!

藝人吳業坤從日本Working Holiday返港後,因疫情關係於酒店進行隔離,連日前31歲生日都要在酒店獨自度過。昨日踏正凌晨12時,他終於「放疫監」踏出酒店,門外有家人及公司同事前來接他,還送上一碗四寶丸,向來饞嘴的他即時品嘗,坦言相當感動。

吳業坤的多件行李中,包括好友麥明詩送的生日禮物跑步機,他珍而重之親自搬上車,受訪時說:「真係恍如隔世,之前喺日本落機都未算真係返到嚟,因為要隔離,雖然酒店房有窗,但唔開得,依家可以真正吸到一啖新鮮空氣,係幾開心嘅事,不過屋企隻貓就唔係好認得我。」

轉贈跑步機做善事

說到跑步機,他指原本麥明詩送了一部貴型號給他,但舖頭送錯貨,最終酒店有2部:「因為隔離期送咗嚟送唔返出去,我問舖頭可唔可以我買埋佢,點知佢哋話送埋畀我,後來部平啲嘅我送咗畀殘障人士宿舍,等佢哋可以做行路運動,算係做咗善事。」