【女兒疑涉毒被捕】 吳耀漢兩年冇工作 腎功能只剩一成

資深藝人吳耀漢嘅54歲女兒昨日涉及一單毒品案被捕，據指海關人員喺機場截查到一個懷疑藏有大麻花嘅包裹，之後海關人員前往收貨地址，進行突擊搜查，並發現單位內有疑似大麻種植場，而被捕女子就係吳耀漢女兒。

現年81歲嘅吳耀漢，近年已甚少參與幕前工作，2019年出席賀歲片《如珠如寶》首映時透露2018年被診斷出腎衰竭，腎功能只剩下約一成。當時佢仲話年輕時忙於拍戲，喺片場經常食飯盒和杯麵醫肚，再加上食唔定時，導致身體出狀況。喺女兒被捕前，吳耀漢接受傳媒訪問時表示近排身體狀況麻麻加上疫情關係，已經兩年冇工作，每日都需要留家洗腎，所以都好少出門口，而醫生亦唔建議佢做換腎手術。

吳耀漢年輕時曾到英國留學，由於非常喜愛戲劇活動，所以由牙科轉修戲劇課程。畢業後便返港發展，後來透過髮型屋客人金燕玲加入無綫，多年嚟佢參演過唔少電影和劇集，例如電影《五福星》系列、《半斤八兩》、《神勇雙響炮》系列、《殭屍》、劇集《群星譜》、《小時候》及《VR驅魔人》等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！