吸引BLACK PINK經理人Follow 李元元萌到入女團？

李璨琛愛女李元元（Lucy）剛踏入3歲便傳來喜訊，她一段挑戰韓國人氣女團BLACK PINK的跳舞片，吸引她們的經理人垂青轉載，更透過社交平台邀請她互相Follow。網民笑指Lucy成功衝出香港，隨時成為最年輕的練習生。

活潑可愛的Lucy向來深得網民歡心，媽咪梁志瑩（Sophia）為她開設的社交網，吸引逾23萬Fans追蹤！日前她上載Lucy挑戰韓國人氣女團BLACK PINK大跳《BOOMBAYAH》的片段，見Lucy跟着節奏左搖右擺，又瞓地使出「揈水髮」，非常厲害！網民大讚她有資格加入韓團，怎料轉頭便發現BLACK PINK所屬的YG事務所經理人SoonHo Choi亦注意到其萌爆演出，將片段轉載至其社交網限時動態。

Sophia得悉後開心表示，一瞓醒便收到無數人通知她這個「喜訊」：「阿BLACK PINK個經理人Post咗肥Lu，呢件事我真係笑到Back Pain（背痛），咩事呀！成件事係咪搞笑o架！頒埋個終身榮耀大獎畀你啦肥Lu。」網民笑指Lucy有機會成為YG年紀最輕的練習生。

開心事陸續有來，昨日SoonHo更要求與Lucy互相Follow，Sophia笑說：「真係做女豚（團）不再是夢，今次真係攞埋個金針獎，未開學已經準備要退學了。」向來視韓星孔劉為偶像的她更笑說：「可唔可以介紹孔劉畀我認識呀？」

李璨琛畀囡囡玩吓

至於李璨琛亦為愛女驕傲，昨日受訪時說：「當然很開心Lucy可以帶給大家歡樂啦！哈哈！BLACK PINK經理人應該都係覺得肥Lu好笑，至會和其他粉絲一樣畀Like和Follow啫！」更指愛女的Fans國際化：「有次去峇里島旅行揼骨，個阿姐都係肥Lu嘅Fans，突然叫：Lucy OMG you're so cute！」問有否興趣做「星爸」，他說：「接吓廣告、影吓相都可以，之前都幫朋友影咗輯Fashion相，畀佢玩吓冇所謂，依家又未使返學，見多啲人同接觸多啲嘢都係好事。當然，開始返學就唔會畀佢做，要專心讀書。」