呂爵安Edan新歌歌詞錯意思 數吓歌詞離譜錯處 《喜歡你》成世紀錯詞懸案

MIRROR成員呂爵安（Edan）早前推出首支個人單曲《E先生連環不幸事件》，搵到寫過無數金曲嘅黃偉文填詞。不過大熱之作唔少嘅Wyman都有失手時候，佢就自爆《E先生連環不幸事件》有句「全心厚待你 仍然功倍但事半」，本來想表達主人公對心儀對象付出幾多都係「事倍功半」，但係填詞時竟然將意思掉轉成「事半功倍」，仲要係監製同Edan都唔為意，直到出街先發覺！

唔止Edan首歌，以下呢幾個例子，有填詞人出現手民之誤，亦有歌手唱錯音，改都改唔返！

馮允謙唱「十了大歲」 唱片公司詞人解畫冇夾口供

外國長大嘅馮允謙，2016年專輯《Coexistence》收錄嘅《葡萄釀的淚》其中一句歌詞「十了大歲」，令樂迷聽到R晒頭。由於首歌係講飲酒後對成長嘅體會，唱片公司起初回應話係特登咁填，表達歌詞主人翁飲醉酒胡言亂語。但係填詞人林若寧就承認係自己填錯，而且監製同佢冇溝通清楚所致，歌詞應該係「大了十歲」先真。咦，keyboard上面個「大」字同「十」字喺正隔離，唔通就係因為咁而出錯？

EO2快歌 英文詞文法出錯

呢單都係關林若寧事。EO2 2008年作品Ladies Night嘅副歌有句英文歌詞”Ladies Night. Let’s Celebration”，出街之後被網民質疑文法有錯。因為Let’s 之後應該配動詞，而Celebration係名詞。過往歌詞有錯的話，唱片公司通常由得佢，但係呢次就錄過個版本，將Let’s Celebration改成That’s Celebration，通順返晒！

《喜歡你》咩係「理怨與她相愛難有自由」？

Beyond經典之作《喜歡你》，多得近年GEM翻唱，令唔少華人都識得唱。首歌面世三十幾年，有句歌詞成為不解疑團，就係「理怨與她相愛難有自由」。從詞義睇，只有「埋怨」冇「理怨」；如果係填「埋怨」，又唔啱音喎。

填詞人梁柏堅就寫過文章討論呢個謎，佢話聽過Beyond嘅黃貫中同黃家強分別演唱過呢首歌，阿Paul唱「抱怨與她相愛難有自由」，認為應該係最好嘅代替字；而家強就唱「你怨與她相愛難有自由」，意思通順但同上文下理唔夾。究竟創作《喜歡你》嘅黃家駒，係想填邊個字？可惜已經無從稽考。

Eason係唱錯發音之王？

呢啲案例唔關填詞人事嘅！初中之後就留學英國嘅陳奕迅，可能唔多熟中文字音，好幾次將歌詞發音搞錯咗。最多人講嘅有《天下無雙》，將「難行日子不削我對生命眷戀」個「削」（讀seok）唱成「肖」（讀「俏」）；《防不勝防》一句「在你抽屜中放低戒指是我」就將「屜」（讀音「替」）唱做「洩」；仲有《苦瓜》「到大悟大徹將虎嚥的昇華 等消化 學沏茶」將「沏」字唱成「切」，而正音係「砌」。不過Eason知道錯處之後，唱live都會將個字唱返啱，而《苦瓜》直情補錄返嗰一句，抵讚！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！