周嘉洛撐好友:畀啲空間佢!

·2 分鐘文章
雖然周嘉洛暫時離組,不過仍抽空回來見吓好拍檔林凱恩。
雖然周嘉洛暫時離組,不過仍抽空回來見吓好拍檔林凱恩。

受不雅短片風波困擾的吳偉豪,昨日缺席《愛回家》宣傳,同劇演員為他講盡好說話,好友周嘉洛希望大家給予空間,劉丹則希望事件慢慢丟淡。

劉丹、呂慧儀、周嘉洛、蘇韻姿、林凱恩等昨日在將軍澳電視城出席處境劇《愛.回家之開心速遞》母親節活動,有疑似自慰片流出的吳偉豪冇影;反而已離開劇組,正拍攝新劇《痞子殿下》的嘉洛則稱因有空檔而現身支持。

蘇韻姿否認戀情

嘉洛與蘇韻姿受訪時皆指有慰問吳偉豪,他說:「有聯絡過佢,想畀啲私人空間佢。(佢情緒點?)近期冇了解過,自己要準備開劇。(佢喺《愛回家》要暫停?)冇聽到呢個消息。(擔心之後冇咗佢?)唔擔心。(會唔會劇情交代佢同你一樣要離開香港?)世事無絕對,但係未必一講就中。(點睇佢拍呢條片?)我個人就覺得社會有唔同標準,件事交咗畀警方處理,大家可以睇清楚件事先,咁早下判斷對佢唔公平,亦希望大家學識互相尊重,畀啲空間佢。」他與蘇韻姿又否認節目《大整蠱》被劉丹踢爆戀情,他稱是劉丹開玩笑,大家不要當真。

劉丹:後生仔受唔住刺激

劉丹亦為吳偉豪講好說話:「大家呢個時候幫幫手,對一個年輕力壯、血氣方剛嘅後生仔嚟講,任何人都有機會做,呢啲根本唔算係咩,唔好發大嚟講,畀佢冷靜吓,等件事慢慢丟淡,後生仔受唔住呢啲刺激,亦奉勸要帶眼識人。」

此外,呂慧儀透露上星期已與兒子到主題公園慶祝母親節,她笑說:「佢不斷用我嘅錢去掟公仔,然後送畀我,都冧嘅。」劉丹透露母親節會在家與太太及子女慶祝,又讚孫女小糯米畫畫送給嫲嫲,相當有孝心。

「熊家3姊妹」呂慧儀(左起)、滕麗名與蘇韻姿合體現身。
「熊家3姊妹」呂慧儀(左起)、滕麗名與蘇韻姿合體現身。