周家蔚素顏直播教化妝 老公囝囝亂入勁溫馨

周家蔚直播化妝,老公洪天明同細仔亂入好搞笑。

【星島日報報道】素顏上鏡對於每一位貪靚女士來講都係好大嘅挑戰,以靚樣搵食嘅女藝人一定更加唔使講!不過做咗人母嘅周家蔚(Janet)就未驚過,素顏喺FB玩直播仲教大家化妝,期間洪天明同細仔JT仲亂入,一家人好溫馨。 話說噚日朝早Janet開直播,提到化妝師放假,要自己郁手化妝預備出席活動,順便同大家分享平時點化妝。素顏嘅佢毫不掩飾,皮膚睇落好光滑冇毛孔,搽咗薄薄一層護膚品已經好有光澤。直播期間老公洪天明仲喺後面入鏡,問老婆做緊咩?Janet就好溫柔咁用英文答自己化緊妝做直播,老公就連聲話OK唔阻住老婆。 一邊化一邊同大家傾偈,Janet全程都壓低把聲同網民交流,三兩下手勢已然搞掂個眼妝, 洪天明仲幫老婆手拎擺喺浴室嘅假眼睫毛出嚟,又叫囝囝準備換衫出門等Janet唔使咁趕。黐假眼睫毛嘅時候囝囝就過來,Janet笑指「我個仔又話要幫我化喇」,囝囝JT好乖咁玩同媽咪傾咗陣同玩咗陣化妝掃就走咗喇。 網民見到Janet素顏都讚靚女,話佢同化妝前後分別唔大,個妝夠晒自然。另外又有網民感嘆Janet一家好溫馨,老公天明好貼心令人羨慕,叫佢開多啲Live分享自己生活!

睇更多